Կառավարությունն իրականացնելու է Հայաստանի ներդրումային հեղինակության բարելավման նոր ծրագրեր

 ՀՀ կառավարությունը 2016 թվականին կիրականացնի Հայաստանի ներդրումային հեղինակության բարելավմանն ուղղված նոր ծրագրեր ու քայլեր: Ինչպես փոխանցում է «Արմենպրես»-ը՝ ՀՀ ներդրումային հեղիանկության բարելավումը ՀՀ կառավարության 2016 թվականի գերակա ծրագրերի թվում է, որը հաստատվել է գործադիրի հունվարի 14-ի նիստում:  

Մասնավորապես, ընթացիկ տարում նախատեսվում է իրականացնել Հայաստանի գործարար միջավայրի բարելավման միջոցառումների 2016 թվականի ծրագիրը, ՀՀ ներդրումային քաղաքականության հայեցակարգի և հայեցակարգից բխող միջոցառումները, ապահովել միջազգային ներդրումային ֆորումի անցկացման համար անհրաժեշտ գործընթացները, զարգացնել ազգային ինովացիոն համակարգի բաղադրիչները:

Ըստ կառավարության, վերջին տարիներին Հայաստանում ներդրումները, այդ թվում` օտարերկրյա ուղղակի ներդրումները, դրսևորել են տատանողական դինամիկա, մասնավորապես` մինչճգնաժամային շրջանում գրանցվում էր ներդրումների աճ, ինչին հաջորդեց ներդրումների կտրուկ անկումը 2009 թվականի ճգնաժամի ընթացքում, իսկ հետագայում դրսևորվեց անկայուն դինամիկա: Մյուս կողմից ՀՀ-ում անկախացումից ի վեր, չնայած «բաց դռների» քաղաքականության իրականացմանը, ներդրումային քաղաքականությանն առնչվող գրեթե ոչ մի փաստաթուղթ չի ընդունվել, բացառությամբ 1994 թվականին ընդունված «Օտարերկրյա ներդրումների մասին» ՀՀ օրենքի, որը ներկայումս որոշակի վերանայման կարիք ունի: Այս պայմաններում, կառավարության դիտարկմամբ, ներդրումների ավելացումը, ներդրումային գործունեության ակտիվացումը, ներդրումային միջավայրի բարելավումն ապահովելու նպատակով խիստ կարևորվում է և անհրաժեշտ է համապատասխան տեսլականի և հստակ գործողությունների ծրագրի առկայություն, ինչը հնարավորություն կընձեռի ունենալ հստակ պատկերացում ներդրումների հետ կապված խնդիրների, դրանց լուծումների և ներդրումային միջավայրի բարելավմանն ուղղված միջոցառում ների վերաբերյալ:

Այդ նպատակով ՀՀ կառավարությունը հաստատել է ՀՀ ներդրումային քաղաքականության հայեցակարգը, որի միջոցառումների ծրագիրը հիմք է հանդիսանալու փուլ առ փուլ լուծելու վերոնշյալ խնդիրները համապատասխան ռազմավարությունների և միջոցառումների իրականացման միջոցով:

Բացի այդ, ՀՀ կառավարությունն Ասիական զարգացման բանկի աջակցությամբ նախաձեռնել է «Հայաստան. ներդրումային համաժողով 2016»-ի իրականացումը, որը կնպաստի օտարերկրյա ներդրումների հոսքերի աճին, ինչպես նաև մրցակցային առավելություն ունեցող հայկական արտադրանքների արտահանմանը և կներկայացնի Հայաստանի ներդրումային հնարավորություններն ու գործարար միջավայրի գրավչությունը: Ներդրումային համաժողովը բարենպաստ հարթակ կհանդիսանա անդրազգային կորպորացիաների, ներդրումային կազմակերպությունների, ֆինանսական կառույցների, բանկերի և հայաստանյան հանրային ու մասնավոր հատվածների ղեկավարների միջև հնարավոր արդյունավետ համագործակցություն նախաձեռնելու համար:

Տնտեսության արդիա­կանացման և ներդրումային յուրահատուկ միջավայր ձևավորելու համար մեծապես կարևորվում է երկրի դիրքավորումը տեխնոլոգիական համընդհանուր արժեշղթաներում: Նշված նպատակի իրագործման հենքը գիտության արդյունքները տնտեսության մեջ ներդնելու գործընթացի հաջորդական փուլերի միջև անցումն ապահովելն է, որի համար տնտեսական լուրջ շարժառիթներ ստեղծելու անհրաժեշ­տություն կա: Այդ առումով, մեծապես կարևորվում է ազգային համակարգի բաղադրիչների զարգացմանը: