Ռուսաստանում հայ երիտասարդը մեղադրվում է մեկ այլ հայ տղայի սպանության մեջ (լուսանկարներ)

Past.am

Օրեր առաջ ՌԴ Սամարա քաղաքի «Вива Лэнд» առեւտրի կենտրոնի մոտ վիճաբանություն է տեղի ունեցել, ինչի արդյունքում մի երիտասարդ մահացել է, 2-ը վիրավորվել։ Ականատեսները պատմել են, որ վիճողները 4 հոգի են եղել, որոնցից մեկը դանակահարել է մյուս երեքին։

«Գիշերը ժամի 1-ին պատուհանից գոռոցներ լսեցի։ Արթնացա, մոտեցա պատուհանին, տեսա՝ երկու հոգի ընկած են ձյան վրա։ Շուտով շտապօգնություն եկավ, մեկին տարան, մյուսին էդպես ընկած թողեցին։ Հետո ոստիկանությունն եկավ, պարզվեց, դանակով հարվածել են նրանց»,- պատմել է ականատեսներից մեկը։ Տղաներից երկուսը ծանր վիճակում տեղափոխվել են հիվանդանոց, երրորդին փրկել հնարավոր չի եղել։

«Մեքենայով անցնում էի, տեսնեմ՝ փողոցում մարդիկ են ընկած։ Մոտեցա, մեկը դեռ կարողանում էր խոսել, բայց շուտով ուշափաթվեց։ Մի այլ երիտասարդ էլ մեքենայից իջավ՝ օգնելու, Հովհաննես էր անունը, երկուսով օգնեցինք, շտապօգնություն կանչեցինք»,- պատմում է մեկ այլ ականատես։

Ավելի ուշ Սամարայի ոստիկանությունը պարզել է, որ բոլոր 4 երիտասարդները հայեր են՝ Հայաստանի քաղաքացիներ։ Ոստիկանները երեկ ձերբակալել են 21-ամյա ՀՀ քաղաքացու, ով մեղադրվում է հայրենակիցներին դակահարելու եւ մեկին սպանելու, իսկ մյուսներին վիրավորելու մեջ։ Թե որն է եղել սպանության պատճառը, հայտնի չէ։ Հայտնի է միայն, որ 21-ամյա երիտասարդն ու 28-ամյա սպանված երիտասարդը ծանոթ են եղել։ Տեսակետ կա, որ վեճը կարող էր ծագել 3 000 ռուբլի պարտքի համար։ Հայտնի է նաեւ, որ դանակահարողը աշխատանք չունի, նախկինում դատապարտված չի եղել։