ՔՊ-ականները կթռչեն, եթե ընդդիմադիր շարժումից ուժ տեսնեն

Գործող ընդդիմությանն այդպես էլ չի հաջողվում իր կողմը քաշել Ազգային ժողովի անկախ պատգամավոր դարձած Իշխան Զաքարյանին։ Նշենք, որ վերջինիս միանալու դեպքում ընդդիմությունը կկարողանա խորհրդարանում իմպիչմենտ գործընթաց սկսել։ Իշխան Զաքարյանը հենց Բագրատ արքեպիսկոպոսին ասել է՝ հավաքեք 53 ստորագրություն, ես կլինեմ 54-րդը, դա նշանակում է, որ ընդդիմությունը ստիպված է լինելու Փաշինյանի իմպիչմենտի գործընթացը սկսելու համար առնվազն 18 հոգու իր կողմը քաշել «Քաղաքացիական պայմանագրից»։

Իհարկե, ՔՊ-ում ամենևին էլ ոչ բոլորն են հավատարիմ Նիկոլ Փաշինյանին, բայց տատանվողներին իրենց կողմը քաշելու համար ընմդդիմությունը ստիպված պետք է լինի ուժ ցույց տալ, կամ էլ այնպիսի իրավիճակ ստեղծի, որպեսզի տատանվող ՔՊ-ականներն էլ անցնեն ընդդիմության կողմը։

Այս պահի դրությամբ, առայժմ, նույնիսկ ընդդիմադիր Արծվիկ Մինասյանն է փաստում, որ հանրային լուրջ ճնշում գոյություն չունի, մյուս կողմից էլ ընդդիմությունն ինքն էլ ցույց չի տալիս, որ պատրաստ է հանուն իշխանափոխության ռադիկալ քայլերի գնալ։

Ամենառադիկալ քայլերից մեկը կարող է լինել մանդատները խորհրդարանում վայր դնելը, և այդ կերպ քաղաքական ճգնաժամ հարուցելը։

Տարբեր չտրամաբանված փաստարկներով՝ ընդդիմադիրները փորձում են խուսափել մանդատները վայր դնելուց, մի կողմից կարող է տպավորություն ստեղծվել, թե ընդդիմությունը կառչած է մանդատներից, մյուս կողմից էլ, փաստն այն է, որ մանդատները վայր դնելու դեպքում դրանք առաջարկվելու են ընդդիմադիր ուժերի այլ համարներում գտնվող անձանց։ Մի քանի հարյուր թեկնածուներից «Հայաստան» և «Պատիվ ունեմ» խմբակցությունը որևէ երաշխիք չունեն, որ իրենց ցուցակների հորիզոնականներում գտնվող անձինք չեն տրվի գայթակղությանը և չեն վերցնի մանդատները։ Արդյունքում, խորհրդարանում կլինի «Հայաստան» և «Պատիվ ունեմ» խմբակցություններ, արդեն գրեթե նիկոլական կազմերով, ինչը նոր վտանգներ կարող է առաջացնել։

Սիրան Ավետիսյան