Արատավոր բարքերի դեմ պայքարում գրանցվել է լուրջ հաջողություն. Սեյրան Օհանյան

Հայրենասիրական դաստիարակության ուղղությամբ 2015 թ. կատարված աշխատանքների արդյունքները ՀՀ պաշտպանության նախարար Սեյրան Օհանյանը գնահատում է բավարար եւ շեշտում, որ տարբեր գերատեսչությունների հետ 7-ամյա համագործակցությունը բերել է աշխատանքի պտուղները:

 Օհանյանը շեշտում է, որ այս տարի նախարարության օրակարգում է ՀՀ եւ ԼՂՀ անկախությունների 25-ամյա տարեդարձին նվիրված տոնակատարությունների անցկացումը, որոնք, ըստ նախարարի, պետք է  պատանիների համար լինեն հայրենասիրության բաց դասեր: Նախարարի գնահատմամբ, անցած տարին բազմաթիվ ձեռքբերումներ են եղել:

«Սահմանին լարվածությունը մեծացել է, եւ մեզ թիկունք կանգնեցին ձեր երեկվա աշակերտները եւ իրենց  առջեւ դրված խնդիրը կատարեցին»,-ասաց Օհանյանը՝ հավելելով, որ արատավոր բարքերի դեմ պայքարում գրանցվել է լուրջ հաջողություն: Սակայն բազմաթիվ խնդիրներ էլ շարունակում են մնալ օրակարգային»,- ասաց Օհանյանը: Օրինակ՝ դպրոցները համաչափ ձեւով չեն զարգանում, եւ բազմաթիվ դպրոցներում ռազմագիտություն առարկայի անցկացումը ցածր մակարդակի վրա է: Այս տարվա աշխատանքի սկզբունքը հետեւյալն է. «Առաջարկիր` քննարկենք, միասնաբար որոշենք»: Նախարարի գնահատմամբ, այս սկզբունքը հնարավորություն կտա որպեսզի ներկայացվեն ստեղծագործական մոտեցումներ եւ հետաքրքրական գաղափարներ ի հայտ գան: