«Շատ են եղել դեպքեր, որ նկարահանվեմ, հետո զղջամ դրա համար». Արման Նավասարդյանը՝ «Սուպեր մամա» ֆիլմից հայտնի դառնալու, նոր ծրագրերի, կնոջ և երեխաների մասին

«Վերջերս եմ վերադարձել բանակից, մասնակցում էի 25 օրյա զորավաժությունների: Ես պահեստազորի սպա եմ, միշտ եղել եմ բանակի կողքին, դա ես հաճույքով եմ անում, համարում եմ, որ դա շատ կարևոր է»,- Tert.am Life-ի հետ զրույցում ասաց դերասան Արման Նավասարդյանը:  

Դերասանը պատմեց, որ զուգահեռ նկարահանվում է ֆիլմում:

«Նարինե Աբգարյանի հայտնի «Մանյունյա» ստեղծագործությունն է ֆիլմի հիմքում: Հերթական շարքն է նկարվում գեղարվեստական ֆիլմի, արդեն 5-րդ եթերաշրջանն է: Ֆիլմը նկարվեց Մոսկվայում՝ Անդրեասյան եղբայրների կողմից, այն մեծ հաջողություն ունի հատկապես Ռուսաստանում, որովհետև նրանց մոտ այս ստեղծագործությունը մեծ արձագանք ստացավ»,- նշեց Արմանը:

Նա ասաց, որ Համազգային թատրոնում շուտով նոր ներկայացման առաջնախաղ է սպասվում: «Զբաղված ենք ես, Ստեփան Ղամբարյանը, Վարշամ Գևորգյանը, Դավիթ Հակոբյանը, ով նաև բեմադրում է ներկայացումը: Փորձերը նորմալ են ընթանում, արդեն վերջնական փուլում ենք, վերջին շտկումներն են արվում, շուտով կհանձնենք հանդիսատեսի դատին»:

Հարցին՝ որպես դերասան թատրոնո՞ւմ եք ավելի լիարժեք զգում, թե՞ ֆիլմում, Արման Նավասարդյանն արձագանքեց. «Մեր տանը: Երբեմն ինքս ինձ հետ լինելու կարիք եմ ունենում: Թատրոնում էլ, կինոյում էլ ինձ շատ լավ եմ զգում, մեկը մեկից տարբեր աշխատանքներ են: Թվում է, թե դերասան ես, նույն գործն ես անում, բայց այդքան էլ այդպես չէ: Տարբեր են ու երկուսն էլ շատ հետաքրքիր աշխարհներ: Երկուսն էլ շատ եմ սիրում»,- անկեղծացավ դերասանը:

Շատ հայտնի մարդկանց ընտանիքի անդամներին հասարակությունը դեմքով ճանաչում է, գիտի նրանց մասին ամեն ինչ: Արման Նավասարդյանն իր անձնականը չի սիրում հանրայնացնել:

«Իմ ընտանքիքի անդամները հայտնի չեն, նրանք իմ մասնագիտության հետ կապ չունեն, ինչո՞ւ պիտի հայտնի լինեն: Երեխաներս սովորում են դպրոցում, տղաս 13 տարեկան է, աղջիկս շուտով կդառնա 9 տարեկան, կինս մասնագիտությամբ ֆինանսիստ է, բայց աշխատում է հրատարակչությունում, ես էլ գլուխս եմ պահում»,- մեզ հետ զրույցում պատմեց Արման Նավասարդյանը:  

Նա նաև նշեց, որ թեև տարիներ շարունակ աշխատում է թատրոնում, բազմաթիվ դերեր է մարմնավորել, բայց հանդիսատեսն իրեն ավելի շատ ճանաչեց «Սուպեր Մամա» ֆիլմից: «Այնպես չի, որ ես հիացած եմ այդ աշխատանքներով, բայց հիմա այդպես է ստացվել: Շատ ավելի լավ ու որակով աշխատանքներ կան, իմ խաղացանկում, որ արժեր դրանով ճանաչեին: Շատ են եղել դեպքեր, որ նկարահանվեմ, հետո զղջամ դրա համար: Հիմա մտածում եմ, որպեսզի չփոշմանեմ, նախապես հրաժարվում եմ: Վերջին շրջանում տարբեր ֆիլմերից եմ հրաժարվել տարբեր պատճառներով՝ սկսած ֆինանսականից վերջացրած սցենարային և կերպարային անհամաձայնություններից»:

Հեղինակ՝ Անի Մնացականյան