Հայաստանում գրիպի եւ թոքաբորբի բուժումն այլեւս անվճար չէ՞

Առողջապահության նախարարի հրամանը, որի համաձայն, գրիպով եւ թոքաբորբով հիվանդների բուժումը հայկական հիվանդանոցներում իրականացվում էր պետպատվերի շրջանակում, գործուն էր մինչեւ հունվարի 20-ը: Հունվարի 21-ից սկսած` այդ հիվանդությունների բուժումը դարձյալ վճարովի է դարձել, ինչը հաստատել են նաեւ Առողջապահության նախարարությունում:  

Հիշեցնենք, որ այս տարի H1N1-ի ակտիվությամբ եւ բարդացումներով ու թոքաբորբով հիվանդների մեծ քանակությամբ պայմանավորված` հունվարի 13-ին առողջապահության նախարարը հրաման էր ստորագրել, որի համաձայն, այդ հիվանդների բուժումը հունվարի 1-ից 20-ի ընթացքում կազմակերպվում էր պետպատվերի շրջանակում:

Առողջապահության նախարարության տեղեկությունների համաձայն, գրիպով եւ ՍՇՎ-ով հիվանդների թիվն արդեն սկսել է նվազել, իսկ արհեստական շնչառության  համակարգին միացված հիվանդները գնալով նվազում են: Սակայն գրիպը դեռեւս ակտիվ է երկրում: Այդ կապակցությամբ արդյո՞ք հնարավոր կլինի երկարաձգել նախարարի հրամանի գործողության ժամկետը կամ նոր հրամանագիր ստորագրել, որպեսզի գրիպով եւ բարդացումներով ավելի շատ հիվանդներ կարողանան բուժում ստանալ պետպատվերի շրջանակում: NEWS.am Medicine-ի թղթակցի հարցին ի պատասխան, նախարարության մամուլի ծառայությունում նշել են, որ այդ մասին խոսելու համար դեռ վաղ է եւ այդ հարցին հնարավոր կլինի պատասխանել մոտ ապագայում:  

Հիշեցնենք նաեւ, որ 2015-ի վերջին շաբաթներից մինչեւ մեր օրերը Հայաստանում H1N1 գրիպի եւ ՍՇՎ-ի ակտիվացում է արձանագրվել եւ այս պահին գրիպի զոհերի ընդհանուր թիվը 18 է: Գրիպի տարածումը կանխելու նպատակով դպրոցական արձակուրդը երեք անգամ մեկ շաբաթով երկարաձգվել է: Ակնկալվում է, որ դպրոցներն ու մանկապարտեզները նորից կսկսեն աշխատել փետրվարի 1-ից: