Ոստիկանի անհարգալից վերաբերմունքից գանգատվող քաղաքացիները բաժանմունքում բախվել են նույն վերաբերմունքին. ահազանգ

«Դինգո թիմ» կենդանասերների պաշտպանությամբ զբաղվող կազմակերպության համակարգող Գոհար Մանուշակյանը Past.am-ին ահազանգեց այն մասին, թե ինչպես են իրենց վերաբերվել հունվարի 22-ին Նոր-Նորքի ոստիկանական բաժանմունքում: Նա պատմեց, որ իրենց ահազանգել էին, որ Նոր Նորքի տարածքում կենդանիների վնասազերծմամբ զբաղվող «Յունիգրաֆ» ընկերության խումբը փորձել է տանել բակի շներից մեկին, որը ներառված է եղել WVS համաշխարհային անասնապահական կազմակերպության անվճար ստերջացման ծրագրում: Ի վերջո, կենդանասերները կարողացել են «Յունիգրաֆի» հետ համաձայնության գալ շանը վերադարձնելու վերաբերյալ:

«Երբ ես և «Դինգո թիմի» նախագահ Օվսաննա Հովսեփյանը բացատրում էինք բնակիչներին, թե ինչու այդ շանը չպետք է հանձնել «Յունիգրաֆին», ոստիկաններից մեկը սկսեց շատ կոպիտ խոսել՝ «մունաթով», բղավելով, ձեռքով-ոտքով, անհարգալից վերաբերմուքն ցուցաբերելով: Խոսակցության ընթացքում ասացի, թե ոնց է նա իրեն թույլ տալիս խոսել քաղաքացու հետ՝ լինելով իրավապահ մարմնի ներկայացուցիչ, ինչին ի պատասխան ասաց. «տո՛, ձեզնից ինչ քաղաքացի»: Ես ասացի, որ նրա հետ խոսելու ոչինչ չունեմ և պարզապես նրա անհարգալից վերաբերմունքի վերաբերյալ դիմում կգրեմ ոստիկանությունում»,- պատմեց Մանուշակյանը՝ հավելելով, որ նրա կոլեգաները փորձում էին շտկել իրավիճակը, սակայն այդ ոստիկանը շարունակում էր իրեն նույն կերպ պահել:

Մեր զրուցակիցը հիշեց նաև, որ այդ ընթացքում ոստիկանների աչքի առաջ բնակիչներից մեկը փորձել էր Օվսաննայի ձեռքից խլել լուսանկարչական սարքը, սակայն ոստիկանները ոչ մի կերպ դրան չէին արձագանքել: Ի վերջո, Գոհար Մանուշակյանը և Օվսաննա Հովսեփյանը կարողանում են նկարել այդ ոստիկանին և լուսանկարը տրամադրել մեզ:

«Դրանից հետո եկանք բաժին, որպեսզի բողոք գրենք, սակայն արժանացանք նույն անհարգալից վերաբերմունքին: Երկու բաժնի պետեր (մեկի ազգանունը՝ Արզումանյան) նույնպես իրենց լկտի պահեցին. խոսում են բացառապես «դու»-ով, «մունաթով», նույնիսկ, երբ փորձեցինք իմանալ մեզ հետ անհարգալից վերաբերված ոստիկանի անունը, որ նշենք դիմումում, ասացին, թե երբ պետք կլինի, կիմանանք: Դրանից հետո օպերատիվ բաժնի պետը մտավ սենյակ և ասաց, թե մեզ հետ կբերեք ինչ-որ Դիանայի: Մենք սկզբում չհասկացանք, թե ում մասին է խոսքը, հետո կռահեցինք, որ խոսքը գնում է կենդանասեր մեկ այլ աղջկա մասին, ով ժամանակին խնդիրներ է ունեցել ոստիկանների հետ: Հակադարձեցինք, թե Դիանան ինչ կապ ունի այս հարցի հետ, ասացինք, որ եթե ուզում են տեսնել այդ աղջկան, պետք է ծանուցում ուղարկեն: Նման վերաբերմունքից հետո համբերությանս բաժակը լցվեց, ասացի՝ եթե շարունակելու են իրենց նման կերպ պահել, դրա մասին կտեղեկացնեմ լրատվամիջոցներին: Արզումանյանն ասաց, թե ինչ ուզում եք արեք, «մեզ չվախացնեք» ձեր լրատվամիջոցներով»,- պատմեց Մանուշակյանը՝ հավելելով, որ ոստիկանությունում իրենց անգամ չեն օգնել դիմում գրելու հարցում, ինչի պատճառով այսօր իրենց նորից կանչել են ոստիկանություն՝ լրացուցիչ պարզաբանումների համար:

Ըստ Մանուշակյանի՝ այսօր իրենք փորձել են պարզել այդ երկու ոստիկանության աշխատակցի անունները, որոնք անհարգալից վերաբերմունք են ցուցաբերել բաժնում, սակայն նրանց հրաժարվել են անուններ հաղորդել, չեն ասել նաև այն ոստիկանի անունը, որից գանգատվելու նպատակով կենդանասերները եկել են բաժին:

ՀԳ: Past.am-ը հետամուտ կլինի ահազանգին և առաջիկայում մեկնաբանություն կներկայացնի ոստիկանության կողմից: Լուսանկարը տրամադրել են «Դինգո թիմ»-ի անդամները:

Լիլիթ Լալայան