Շուշանիկ Բախշյանը շարունակելու է աշխատել. քանի դեռ չկա դատարանի որոշում. ԲԿ-ի բուժգծով տեղակալ

News.am-ը գրում է .

Երեւանի «Շենգավիթ» ԲԿ-ի բժշկուհի, ծննդկան Մերի Մարգարյանի եւ նրա նորածնի մահվան մեջ կասկածվող Շուշանիկ Բախշյանը շարունակելու է աշխատել ԲԿ-ում, քանի դեռ չկա դատարանի որոշումը: Այս մասին NEWS.am-ի թղթակցի հետ զրույցում ասաց «Շենգավիթ» ԲԿ-ի բուժգծով տեղակալ Դավիթ Մխիթարյանը՝ անդրադառնալով նախօրեին Շուշանիկ Բախշյանի ձերբակալությանը: 

«Աշխատանքից հեռացնել չենք կարող կամ չենք էլ անելու այնքան ժամանակ, մինչեւ որ դատարանի որոշում չլինի: Այս պարագայում մենք որեւէ իրավասության չունենք՝ կարգավիճակ փոխելու»,- ասաց Դավիթ Մխիթարյանը:

Նշենք, որ Մերի Մարգարյանի գործով տուժողի իրավահաջորդի ներկայացուցիչը միջնորդություն են ներկայացրել՝ մեղավոր անձանց շրջանակը պարզելու, մեղադրանք առաջադրելու եւ խափանման միջոց ընտրելու վերաբերյալ: Փաստաբան Մարինե Թովմասյանի խոսքով՝ իրենք չեն սահմանափակվում միայն Շուշանիկ Բախշյանի ձերբակալմամբ, քանի որ դեռ կան բժիշկներ, որոնց պատասխանատվության հարցը պետք է բարձրացվի:

Հիշեցնենք, որ Շուշանիկ Բախշյանին են հարազատները մեղադրում են ծննդկանի եւ նորածնի մահվան մեջ:

Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, հուլիսի 29-ին նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:

Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է։