Օդից բռնեցին, ձերբակալեցին, կարելի է մտածել՝ մենակ է. Շուշանիկ Բախշյանի փաստաբան

News.am-ը գրում է .

Երեւանի «Շենգավիթ» բժշկական կենտրոնի բժշկուհի, հունվարի 22-ին ձերբակալված եւ հունվարի 23-ին Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշմամբ ազատ արձակված Շուշանիկ Բախշյանը դեռեւս հիվանդանոցում է, ունի բարձր ջերմություն: Այս մասին NEWS.am-ի թղթակցի հետ զրույցում ասաց բժշկուհու փաստաբան Ալեքսանդր Սիրունյանը:

«Գիշերը 1-2-ին խոսել եմ հետը, ջերմությունը բարձր էր դեռ՝ 39-ը, այս պահի դրությամբ վիճակի մասին տեղեկություն չունեմ»,-ասաց փաստաբանը:

Ալեքսանդր Սիրունյանը նշեց, որ իր պաշտպանյալին անհիմն էին ձերբակալել, եւ նույնիսկ հարկ չկար, որ Շուշանիկ Բախշյանը քննչական գործողություններին մասնակցեր:

«Քննչական գործողություններին մասնակցելու չունենք, օդից բռնեցին, ձերբակալեցին, կարելի է մտածել, թե մենակ է»,-նշեց փաստաբանը՝ անդրադառնալով իր պաշտպանյալի վատառողջության պատճառով քննչական գործողություններին չմասնակցելուն:

«Նորք» ինֆեկցիոն հիվանդանոցից մեզ չհաջողվեց պարզել, թե ինչ վիճակում է բժշկուհին:

Նշենք, որ Կենտրոն եւ Նորք Մարաշ վարչական շրջանների ընդհանուր իրավասության դատարանը հունվարի 23-ին պարտավորեցրել է քննիչին ազատ արձակել նախօրեին ձերբակալված Շուշանիկ Բախշյանին: Ըստ բժշկուհու փաստաբանի՝ քննիչը դատարանի դահլիճից «փախել է»:

Հիշեցնենք, որ Շուշանիկ Բախշյանին են հարազատները մեղադրում ծննդկանի եւ նորածնի մահվան մեջ: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Միայն հուլիսի 26-ին են նրան հիվանդանոց ընդունել, սակայն հաջորդ օրն արդեն իսկ խորհուրդ են տվել տեղափոխել այլ հիվանդանոց: Հարազատները տեղափոխել են «Էրեբունի» ԲԿ, որտեղ նրան անմիջապես կեսարյան հատում են արել: Մերիի վիճակը ծայրահեղ ծանր է եղել, հուլիսի 29-ին նա մահացել է: Հուլիսի 30-ին կեսօրին մահացել է նաեւ ծննդկանի նորածին դուստրը:

Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է։