Ֆիզիկապես և հոգեպես պատրաստ եմ օգոստոսի 23-ին կայանալիք «Fight night Global»-ի մրցաշարին. Կ. Ունանյան

Սույն թվականի հուլիսի 14-ին Հայաստանում կայացավ «MixFight 56» MMA մարզաձևի հերթական խոշոր միջազգային մրցաշարը, որին, ինչպես միշտ տպավորիչ և փայլուն հաղթանակ տարավ կարատեի աշխարհի ու Եվրոպայի չեմպիոն  Կամո Ունանյանը: Արձանագրված և սպասվելիք հաղթանակների շուրջ  Past.am-ը զրուցել է Ունանյանի հետ:

-Կամո, Դուք այն բացառիկ մարզիկներից եք, ում մենամարտերին սպասում ենք բոլորս, բայցևայդպես այս անգամ ևս Ղազախստանի ներկայացուցիչ Մուհամմեդ Խան Օսպանովի հետ մարտին չհասցրեցինք երկար հետևել, այն բավական կարճ տևեց: Ո՞ր գոտու համար էիք պայքարում և ինչպե՞ս հաղթեցիք մրցակցին:

- Այո, Ղազախստանի ներկայացուցիչ Մուհամմեդ Խան Օսպանովի հետ մարտը բավական կարճ տևեց, քանի որ հաղթեցի առաջին ռաունդում՝ նոկաուդով, դրանով իսկ MMA իմ ռեկորդը դարձնելով 7 մենամարտ՝ 7 հաղթանակ: Մենամարտը ընթանում էր WKN վարկածով գոտու համար։ 

- Ե՞րբ է մեկնարկել MMA-ի Ձեր կարիերան: 

-Այն սկսել եմ մոտ մեկուկես տարի առաջ, որի ընթացքում 7 մենամարտ եմ ունեցել, անգամ ոլորտային վերլուծաբանները կփաստեն, որ MMA-ում մարզիկները մեկ տարվա կտրվածքով լավագույն դեպքում երկու, ամենաշատը՝ երեք մենամարտ են ունենում:

-Հաշվի առնելով մենամարտերի գրեթե անընդմեջությունը կարո՞ղ ենք ասել, որ հաջորդ մենամարտը կլինի մոտ ապագայում:

-Անշուշտ չեք սխալվի, հաջորդ մենամարտը տեղի է ունենալու օգոստոսի 23-ին, այն կազմակերպելու է  ռուսական «Fight night Global» ընկերությունը, որն, ի դեպ, առաջին անգամ է մեր երկրում նման նախաձեռնությամբ հանդես գալու, բավական մեծ մրցաշար է լինելու:

-Իսկ ո՞վ է լինելու Ձեր հակառակորդը:

-Այս պահի դրությամբ որևէ տեղեկություն չունեմ, մոտ օրերս նոր պարզ կլինի, թե ով է ինձ հետ մենամարտելու: Ով էլ որ լինի, անելու եմ ամեն ինչ, որ հերթական մրցապայքարը վաղաժամ ավարտ ունենա:

-Մշտապես ֆզիկական լավ վիճակում եք գտնվում, ի՞նչ հաճախականությամբ և որտե՞ղ եք մարզվում, այս հաղթանակների ֆոնին՝ հանդես գալով Հայաստանի դրոշի ներքո պետական որևէ աջակցություն ստանո՞ւմ եք:

-Իրականում կապ չունի կարատեի, թե MMA մրցարշավի եմ նախապատրաստվում, մարզվում եմ «Օրիոն» մարզական ակումբում՝ խիստ կանոնակարգով, քանի որ սպորտում կարևորում եմ կարգապահությունը՝ առանց կարգապահության լուրջ հաջողությունների հնարավոր չէ հասնել: Ինչ վերաբերում է պետության կողմից աջակցություններին, ապա, ես վաղուց հրաժարվել եմ դրանցից, այդ ուղղությամբ անգամ չեմ էլ մտածում:

- MMA վերջին մրցապայքարից հետո Ձեր երկրպագուների շրջանում խոսակցություններ կային, որ մրցարշավին մասնակցելու ժամանակ վնասվածք եք ունեցել:

-Այո, ունեմ տարբեր վնասվածքներ՝ մեջքի, ոտքի, ձեռքի հատվածում, սակայն այդ ամենն ինձ չի կարող ընկճել, քանի որ բուժումներին զուգահեռ պարապում եմ, հոգեպես և ֆիզիկապես պատրաստ եմ լուրջ մրցապայքարների: Իմ կարիերայի ընթացքում ամեն ինչ անելու եմ Հայաստանի Հանրապետության դրոշը մշտապես բարձր պահելու համար: