Թրամփը Հարիսին ոչ կոմպետենտ է որակել, Հարիսի շտաբն արձագանքել է

«Նրանք առջևում դեռ հինգ ամիս ժամանակ ունեն ինչ-որ բան անելու համար, բայց ես կարծում եմ, որ ոչինչ չեն անի: Այս ամենը միայն խոսակցություն է»,- ասել է Թրամփը՝ շեշտելով, որ և՛ Հարիսը, և՛ Բայդենը կոմպետենտ չեն։

ԱՄՆ նախկին նախագահն ընդգծել է, որ Հարիսին նույնիսկ էլ ավելի ոչ կոմպետենտ է համարում, քան Բայդենին, «ինչն ինչ-որ բան է ասում, որովհետև Բայդենը բնավ լավ նախագահ չէ»։

Անդրադառնալով Բայդենին՝ Թրամփը հայտարարել է, որ ԱՄՆ գործող նախագահը «հիմարություններ» է ասում, ինչը պայմանավորված է նրա «ցածր IQ մակարդակով» և ինչն էլ հանգեցրել է ռուս-ուկրաինական պատերազմի։

«Նրա IQ-ն ցածր էր 30 տարի առաջ, սակայն հիմա նա, հավանաբար, ընդհանրապես չունի IQ։ Նա այնպիսի հիմարություններ էր անում։ Այս պատերազմի սկսվելու հավանականությունը զրոյական էր», - հայտարարել է Թրամփը։

Ավելի ուշ Քամալա Հարիսի նախընտրական շտաբի ներկայացուցիչ Ջոզեֆ Կոստելոն արձագանքել է Թրամփի հայտարարություններին՝ նշելով, որ Թրամփը պարզապես փորձում է հաճոյանալ Մասկին և այլ «ինքնահավան մեծահարուստներին»։

Հարիսի շտաբը հայտարարել է, որ Թրամփը Մասկի հետ հարցազրույցով ցույց է տվել, որ հավատարիմ է «ծայրահեղական և վտանգավոր» հայացքներին։

«Թրամփի ամբողջ քարոզարշավը հիմնված է իր և Իլոն Մասկի նման մարդկանց՝ ինքնահավան մեծահարուսներին ծառայելու վրա», - հայտարարել են ԱՄՆ փոխնախագահի նախընտրական շտաբից՝ շեշտելով, որ նման մարդիկ «կծախեն միջին խավը, բայց չեն կարող ուղիղ հեռարձակում անցկացնել 2024 թվականին»։