Շիրակի մարզի ճանապարհների սպասարկումն իրականացնող ընկերություններն ու մարզի փրկարարներն աշխատում են արտակարգ գրաֆիկով

Շիրակի մարզում փակ ճանապարհներ չկան, սակայն բքի և տեսանելության բացակայության պատճառով ճանապարհները դժվարանցանելի են: Այս մասին «Արմենպրես»-ին տեղեկացեց Շիրակի մարզպետարանի քաղաքաշինության վարչության կապի, տրանսպորտի ու ճանապարհաշինության վարչության պետ Խաչիկ Խնձրցյանը՝ նշելով, որ մարզի ճանապարհների սպասարկումն իրականացնող ընկերություններն աշխատ ում են արտակարգ գրաֆիկով:

Արտակարգ գրաֆիկով ու լարված ողջ գիշեր և արդեն հունվարի 25-ին իրենց ծառայությունն են իրականացնում մարզի փրկարարները: Ի դեպ, գետնաբքի ու տեսանելիության բացակայության պատճառով Շիրակի  մարզի  փրկարարական վարչության առաջարկով ճանապարհային ոստիկանության կողմից ժամանակավորապես փակվել է Գյումրի-Բավրա ճանապարհահատվածը: Ինչպես «Արմենպրես»-ին տեղեկացրեց ՀՀ ՏԿԱԻՆ Շիրակի մարզի փրկարարական վարչության պետ Մարատ Սարբեկյանը, հունվարի 24-ից մարզի փրկարարական վարչությունը աշխատում է արտակարգ ռեժիմով,  գրեթե չեն դադարում ահազանգերը մարզի այս կամ այն հատվածում հայտնված մեքենաների մասին:

«Հիմնականում դժվարանցանելի է Գյումրի-Բավրա, Գյումի-Երևան ճանապարհի Լանջիկի հատվածում, Գյումրի-Ջաջուռ ճանապարհը: Թեև ճանապարհները բաց են, սակայն ձնաբքի պատճառով առաջանում են խցանումներ: Այս ընթացքում 400-500  զանգ ենք ընդունել: Միայն հունվարի 24-ի դրությամբ ճանապարհաշինարարների օգնությամբ մարզի տարբեր հատվածներից դուրս է բերվել ավելի քան 25 մեքենա՝ 60-70 մարդ: Գործի են դրվել ամենագնացները: Բուքն այս պահի դրությամբ շարունակվում է»,-նշեց Մարատ Սարբեկյանը՝ բնակչությանը կոչ անելով հնարավորության սահմաններում  տանից դուրս չգալ, ճանա պարհ ընկնել միայն ձմեռային անվադողերով, օգտվել գնացքից: