«Ֆիլմը մեր մասին է, շատ իրական, այն հրաշքի գոյության մասին է». Անահիտ Կիրակոսյանն ու Գրետա Մեջլումյանը՝ «Նոր տարվա կինո» ֆիլմում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Կարևոր չէր, թե այս նախագծում ինչ կերպար էի մարմնավորելու, որովհետև, երբ Ելենա Արշակյանն ինձ պատմեց ֆիլմի գաղափարի մասին, այն եզակի դեպքերից էր, որ ես չեմ հարցրել՝ ինչ եմ խաղալու: Ասացի՝ ես այս ֆիլմու կլինեմ, ինչ կերպար ուզում է լինի»,- Tert.am Life-ի հետ զրույցում պատմեց դերասանուհի Անահիտ Կիրակոսյանն, ով Ելենա Արշակյանի «Նոր տարվա կինո» գեղարվեստական ֆիլմում մարմանվորում է լրագրողի կերպար: Դերասանուհին խոստովանում է, որ սցենարն այնքան տպավորիչ է, որ կարդալուց չի կարողացել թաքցնել հուզմունքը:

«Ընթերցանությունն ավարտվել է և ես ուղղակի բարձրաձայն, հոնգուր-հոնգուր լաց եմ եղել: Նման դեպք չեմ հիշում, որ սցենարը կարդամ ու հուզվեմ: Ֆիլմը շատ մեր մասին է, շատ իրական, դրա հետ մեկտեղ հրաշքի գոյության մասին է, երազանքին հավատալու, ու, երբ դիմացինի երազանքը դառնում է նաև քոնը», -նշեց Անահիտը:

Նրա խոսքով՝ ֆիլմի շնորհիվ ծանոթանալու ենք Հայաստանի մարզերի հետ, բացահայտելու դրանց կոլորիտն ու բարբառները:

«Մենք հաճախ ֆիլմեր ենք նայում, որոնք ամերիկյան կամ եվրոպական ստանդարտներով են նկարվում, իսկ այս ֆիլմը մեր մասին է: Ես՝ որպես լոռեցի, բնականաբար, կապ ունեմ Լոռվա մարզի հետ: Կերպարս շատ փոքր է, ֆիլմի գլխավոր հերոսներին է լրացնում, բայց հաճույքով եմ նկարահանվել: Շատ դրական ու լավ մթնոլորտում են անցել նկարահանումները՝ ֆիլմին հատուկ դժվարություններով (դրսի տեսարանների հետ կապված): Բայց այդ դժվարությունների մեջ այնքան ջերմություն կար, ու պրոֆեսիոնալ թիմ էր աշխատում, որ չի կարող լավ գործ չստացվի»,- ասում է դերասանուհին: Ֆիլմի համ ու հոտն ըստ նրա՝ Լիանա Վանոյանն է` իր կերպարով. «շատ զվարճալի էր կադրից դուրս էլ նրա հետ գտնվել նկարահաման հրապարակում»:

Անահիտ Կիրակոսյանը խոստովանեց, որ, եթե անգամ չնկարահանվեր այս ֆիլմում, միևնույն է՝ անպայման կգնար այն ընտանիքով դիտելու:

«Ինձ համար անսպասելի էր Ելենայի առաջարկը, մտածեցի, իմ տարիքի համաձայն՝ տատիկ եմ խաղալու: Ելենան ասաց. «Ոչ, տիկին Մեջլումյան, տատիկի դեր չեք խաղալու, շատ հետաքրքիր, էքստրավագանտ դեր եմ տալու՝ կոմիկական երանգներով»:

Ես ծիծաղեցի ու ասացի՝ «չեմ կարող»: Բայց նա պնդեց, որ կարող եմ: Պարզվեց նա ինձ ավելի լավ էր ճանաչում, քան ես ինքս»,- մեզ հետ զրույցում պատմեց դերասանուհի Գրետա Մեջլումյանն, ով ևս ներգրավված է ֆիլմում:

Դերասանուհու խոսքով՝ նկարահանումների ընթացքն անցել է շատ հետաքրքիր, իսկ երիտասարդների հետ աշխատելը նրա համար գերագույն հաճույք էր:

«Նկարահանումների ընթացքում ես հասկացա, թե Ելենան որքան լավ է ճանաչում իր ընտրած դերասաններին, այդ առումով նա հոգեբան է: Նա ժպիտը դեմքին, բոլորի հետ մարդկային, ուշադիր, նրանից երբեք չես զգա նման վերաբերմունք՝ «ես տերն եմ այս ֆիլմի, ինձ պետք է ենթարկվեք»»,- անկեղծացավ դերասանուհին, ու նշեց, որ իր մարմնավորած կերպարը տարիքով իրենից բավական երիտասարդ կին է, ով ոտքից գլուխ սիրահարված է թատրոնին:

Գրետա Մեջլումյանի բնորոշմամբ՝ ֆիլմում և՛ թախիծ կա, և՛ հումոր, և՛ ռոմանտիկա, և՛ երազանք: Ըստ դերասանուհու՝ Ֆիլմում շատ են անսպասելի իրադարձությունները:

«Ելենան շատ հետաքրքիր էքսկուրս է կատարել, ֆիլմը Հայաստանի տարբեր մարզերում է նկարահանվել, մարդիկ չեն ձանձրանա ու ժպիտով կնայեն: Ինձ համար շատ հաճելի էր լինել նման մթնոլորտում: Ամեն ինչ շատ ճիշտ կազմակերպված էր, և՛ տեխնիկական, և՛ ստեղծագործական առումով: Բոլորը համախմբված ու նվիրված աշխատեցին: Պրոֆեսիոնալ թիմ էր, և ես վստահ եմ, որ ֆիլմը հաջողություն կունենա»,- ամփոփեց Գրետա Մեջլումյանը:  

Հիշեցնենք, Ելենա Արշակյանի «Նոր տարվա կինո»-ն հանդիսատեսի դատին կհանձնվի աշնանը: Սցենարի հեղինակը Անահիտ Մխիթարյանն է: Ֆիլմում ներգրավված են մի շարք հայտնի ու սիրված դեմքեր, որոնց դեռ շարունակելու ենք բացահայտել: