«Երազանքս է հանդիպել ու երգել նրա հետ». Սելին Դիոնը տեսել է Սյուզաննա Մելքոնյանի կատարմամբ իր՝ «It’s All coming back to me now» երգի հոլովակը

«Այս աշխարհում՝ համաշխարհային մակարդակի մի երգչուհի կա, ում  իրականում ուզում եմ տեսնել, ինչու չէ՝ երգել իր հետ: Երազանքներ են, որոնք քիչ-քիչ վերածվում են նպատակի: Վերջին շրջանում իմ մեդիա դաշտում կոնտենտը ուղղված է Սելին Դիոնի երգերը կատարելուն: Ես շատ պրոֆեսիոնալ ձևով եմ փորձում մոտենալ յուրաքանչյուր հոլովակի, որ այսուհետ ներկայացնում եմ և շարունակելու եմ ներկայացնել»,- Tert.am Life-ի հետ զրույցում պատմեց երգչուհի Սյուզաննա Մելքոնյանն, ով օրերս ինստագրամյան իր էջում հրապարակել է հոլովակ, որտեղ կատարում է Սելին Դիոնի «It’s All coming back to me now» հայտնի երգը:

Կարճ ժամանակում հոլովակը մեծ արձագանք է գտել երգչուհու հետևորդների կողմից, արժանացել բարձր գնահատականի: Սյուզաննայի խոսքով՝ Սելին Դիոնը դեռ չի արձագանքել:

«Ինչ վերաբերվում է «It’s All coming back to me now» երգին, այս երգը շատ վաղուց եմ պարապում, արդեն մի քանի տարի է: Եվ «Ну-Ка Все Вместе» նախագծի ֆինալից առաջ պրոդյուսերական թիմի հետ քննարկումներ եղան այս երգի ու «I Surrender»-ի միջև: Այն ժամանակ ավելի հարմար գտանք «I Surrender» երգը, բայց, քանի որ այս երգը ևս աննկարագրելի սիրում եմ և դեռ չեմ ունեցել առիթ ու հնարավորություն մեծ բեմում կատարելու, որոշեցի այս տարբերակով իմ լսարանին մատուցել:

Մեդիա դաշտում այսօր շատ բան է հնարավոր, իմ լսարանի, իմ հրաշք հետևորդների շնորհիվ՝ Սելին Դիոնն իր պաշտոնական էջով սթորի բաժնում տեսել է, սա 2-րդ անգամ է: Ես մեծ հավատ ունեմ, որ մենք մի օր անպայման կհանդիպենք: Հաջորդիվ շարունակելու եմ ներկայացնել երգչուհու հանրահայտ ալբոմից շատ երգեր: Երազանքս է ունենալ մեծ մենահամերգ, որտեղ մաքսիմալ շատ կկարաղանամ երգել ու իմ լսարանին մատուցել հենց իր երգերը»,- նշեց երգչուհի Սյուզաննա Մելքոնյանը:

 Հեղինակ՝ Անի Մնացականյան