«Բամբիռ»-ի «Մանկական խաղեր» ալբոմի փակ շնորհանդեսը՝ խմբի համար խորհրդանշական վայրում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երեկ՝ սեպտեմբերի 17-ին, հայկական լեգենդար «Բամբիռ» ռոք խումբը փակ շնորհանդեսի շրջանակում ներկայացրեց իր նոր՝ «Մանկական խաղեր» ալբոմը, որը թվով 12-րդն է խմբի ձայնասկավառկների շարքում։ Խմբի անդամները միջոցառումը կազմակերպել էին խորհրդանշական վայրում՝ The Meeting Point Studio-ում, որտեղ, սկսած 2014 թ-ից, ստեղծվել են նրանց երգերը։ 

«Շատ անգամներ մենք այստեղ մենակ ենք եղել, բայց միշտ ցանկացել ենք, որ այսքան մարդ այստեղ լինի ու կիսվենք մեր նորությամբ: Սա երեւի մեր առաջին մեծ շնորհանդեսն է այստեղ, բայց այսուհետ ավելի հաճախ կհանդիպենք այս վայրում»,-խոստացավ Նարեկ Բարսեղյանը։ 

«Մանկական խաղեր» ալբոմն անդրադառնում է մանկական անմեղության եւ չափահասության ժամանակ այցելող հիասթափության բախմանը։ «Բամբիռի» անդամները նշում են՝ այն դուրս է ռոքի ավանդական պատկերացումներից։ Համադրելով անզուսպ անկեղծությունը եւ փորձարարական հնչյունները՝ այստեղ ընդլայնված են ժանրի սահմանները։ Ալբոմն անդրադառնում է այն անմիտ դաժանություններին եւ տանջանքներին, որոնք չափահաս մարդիկ վերապրում են՝ չհասունանալով թե՛ իրենց, թե՛ մյուսների հանդեպ։

Ալբոմը բաղկացած է 8 երգից, որոնցից 2-րդը՝ «Թռնենք»-ը, երեկ ներկայացվեց տեսահոլովակի տեսքով։ Խմբի անդամները շնորհանդեսն ավելի հետաքրքիր դարձրին ուղիղ ձայնագրման ստուդիայից կենդանի կատարումներով։ 

«Մանկական խաղեր» ալբոմը ճանապարհորդություն է չափահասության մութ անկյուններով, որը բացահայտում է մանկության ազդեցությունն ու դրա կարեւորությունն ապագա կյանքի ձեւավորման գործում։

«Ալբոմն իրենից նոր ոճ չի ներկայացնում, պարզապես մեկ տարի առաջ, երբ Հանրային հեռուստաընկերության հետ ճանապարհորդում էինք Հայաստանով, երգերը նոր շունչ ձեռք բերեցին, ու երբ վերադարձանք, հուլիսից սեպտեմբերն ընկած հատվածում մոտ 6 երգ գրեցինք, ու սկսեցինք աշխատել ձայնագրման ու թողարկման շուրջ: Ինչ վերաբերում է սպասելիքներին՝ կարծում եմ՝ մեր երկրում ալբոմի թողարկումն արդեն հաջողություն է, քանի որ գլխիցդ հանեցիր մի մեծ նյութ ու տեղ հատկացրիր նոր գաղափարների համար: Թե ինչ կմտածեն մարդիկ, դա թողնում ենք յուրաքանչյուրի զգացողության վրա»,-հավելում է Նարեկը։ 

Ալբոմը սկսվում է «Փակ շուրջպար» երգով, որում կան տողեր լեգենդար Կոմիտասից։ Երգերից շատերում անդրադարձ կա մեծերից։ «Կոմիտասը ազգի վիճակը ներկայացրել էր 100 տարի առաջ, եւ երբ այն կարդում ես, հուզվում ես, որովհետեւ զգում ես, որ այդ տարիների մեջ ոչինչ չի փոխվել: Այդ տեղից ցավը եկավ: Թաքնված ու վերապրված բաներ այստեղ տեղ-տեղ հանդիպում են»,-մանրամասնում է երաժիշտը։ 

Ի՞նչ է «Բամբիռը»․ խմբի անդամները դժվարանում են կոնկրետ պատասխան տալ, քանի որ խումբը 4 տասնյակ տարիների ընթացքում փոխվել է ինչպես կազմով, այնպես էլ երգացանկով, բայց մի բան հստակ է՝ «Բամբիռը» ենթամշակույթ է, որտեղ յուրաքանչյուր անդամ ունի իր դերն ու պատասխանատվությունը։ Խմբի հաջողությունը սիրո, միասնականության ու կարեկցանքի մեջ է։ «Երբ ունես փորձ, գալիս է կարեկցանք, սեր, որը ապրեցնում է խումբը»,-վստահ են խմբի անդամները, որոնք խոստանում են՝ տարեվերջին կունենան շրջագայություններ, որոնց ընթացքում կներկայանան նոր ծրագրով։

Սյունե Առաքելյան

Առավել մանրամասն` այստեղ.

https://t.me/armenia24live