Լարիսա Ալավերդյանը ԵԽԽՎ-ում աշխատանքի հայեցակարգի անհրաժեշտություն է տեսնում

Եվրոպայի Խորհրդի խորհրդարանական վեհաժողովում հայաստանյան պատվիրակության աշխատանքի հստակ հայեցակարգ պետք է մշակվի: Հունվարի 26-ին լրագրողների հետ հանդիպմանը նման կարծիք հայտնեց «Ընդդեմ իրավական կամայականությունների» հասարակական կազմակերպության նախագահ Լարիսա Ալավերդյանը: «Ես կարծում եմ, որ հարկավոր է մշակել հստակ հայեցակարգ, որով կառաջնորդվի մեր պատվիրակությունը: Քանի դեռ չկա այդ հայեցակարգը, Ադրբեջանը շարունակելու է հակահայկական զեկույցներ ու բանաձևեր բերել ու դրանք անցկացնելու փորձեր կատարել: Մեր պատվիրակությունը պետք է ավելի ակտիվ լինի, մենք էլ պետք է ներկայացնենք զեկույցներ, որոնցում հստակ արտացոլված կլինի իրականությունը՝ կապված Լեռնային Ղարաբաղի հակամարտության հետ»,- «Արմենպրես»-ի հաղորդմամբ՝ նշեց Ալավեր դյանը:

Նա ընդգծեց, որ ԵԽԽՎ ձմեռային նստաշրջանի օրակարգում ընդգրկված հակահայկական բանաձևերը ոչ թե հայաստանյան պատվիրակության թերացման, այլ հստակ հայեցակարգի ու ամենօրյա աշխատանքի բացակայության արդյունք են: «Այդպիսի կառույցներում հայկական պատվիրակությունները պարտավոր են ամենօրյա աշխատանք կատարել: Եվ ոչ միայն պատվիրակությունները, ակտիվ ներգրավված պետք է լինի նաև արտաքին գործերի նախարարությունը: Ես այստեղ անձերի ու պատվիրակության խնդիր չեմ տեսնում: Խնդիրը հայեցակարգի բացակայությունն է: Մեր պատվիրակությունը պետք է ավելի ակտիվ լինի&raqu ;,- ընդգծեց Ալավերդյանը՝ անդրադառնալով ԵԽԽՎ հայաստանյան պատվիրակության կազմը փոխելու խոսակցություններին:

Նա նաև հավելեց, որ իր համար միևնույն է՝ կընդունվեն հակահայկական զեկույցները, թե ոչ՝ ընդգծելով, որ անգամ ընդունվելու դեպքում դրանք պարտադիր չեն: Միևնույն ժամանակ, նա ևս մեկ անգամ ընդգծեց, որ հայաստանյան պատվիրակությունը պետք է փոխի իր աշխատանքի ոճը և մոտեցումները: