Թենիսի տղամարդկանց եւ կանանց հավաքականները կմասնակցեն աշխարհի թիմային առաջնություններին

Հայաստանի թենիսի տղամարդկանց եւ կանանց հավաքականները պատրաստվում են մասնակցել աշխարհի թիմային առաջնություններին: Ինչպես «Արմենպրես»-ին տեղեկացրեց Հայաստանի թենիսի ազգային ֆեդերացիայի մրցավարական գծով կոորդինատոր Արսեն Մովսիսյանը, տղամարդկանց թիմային առաջնությունը տեղի է ունենալու մարտի 2-5-ը` Էստոնիայի մայրաքաղաք Տալլինում: Հայաստանի հավաքականի կազմում հանդես կգան Միքաել Ավետիսյանը, Սեդրակ Խաչատրյանը, Միքաել Խաչատրյանը: Չորրորդ մասնակցի անունը պարզ կդառնա մի քանի օրից: Ամենայն հավանականությամբ` չորրորդ մասնակիցը Հենրիկ Նիկողոսյանը կլինի:

Համաշխարհային դասակարգման աղյուսակում Հայաստանի տղամարդկանց հավաքականը զբաղեցնում է 117-րդ հորիզոնականը: «Թիմերը բաժանվելու են չորս ենթախմբերի: Հայաստանի հավաքականը հանդես է գալիս Եվրա- Աֆրիկյան երրորդ ենթախմբում: Վիճակահանությամբ կորոշվի, թե որ երկրի հավաքականի հետ ենք մրցելու: Նախ առաջին համարներն են մրցելու: Հաղթողը իր հավաքականին հնարավորություն է տալիս բարձրանալ երկրորդ ենթախումբ»,-ասաց Մովսիսյանը:

Կանանց առաջնությունը տեղի է ունենալու ապրիլի 13-18-ը Մոնտենեգրոյում: Հայաստանի հավաքականի մասնակիցների անունները վերջնականապես կճշտվեն փետրվարին: Հիմնական թեկնածուներն են առաջին ռակետ Անի Ամիրաղյանը, Լուսինե Չոբանյանը, Անի Սաֆարյանը, Միլեն Ավետիսյանը:

Հայաստանի կանանց հավաքականը զբաղեցնում է համաշխարհային վարկանիշային աղյուսակի 85-րդ հորիոնականը եւ հանդես է գալու Եվրա- Աֆրիկյան երրորդ ենթախմբում: «Հիմնականում հույսերը կապված են Անի Ամիրաղյանի հետ: Հույս ունենք, որ նա կհաղթի իր մենախաղում, դրանից հետո երկրորդ միավորի համար պայքարելու են զուգախաղում»,-նշեց Ա. Մովսիսյանը: