Թել Ավիվի երկինքը, որերորդ օրն է, կարմիր է․ հայերը լքում են Իսրայելը
ՀԱՐՑԱԶՐՈՒՅՑՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Մերձավոր Արևելքում իրավիճակը գնալով բարդանում է: Չնայած որ Իսրայելն է հիմնականում հարվածներ հասցնում Լիբանանին, սակայն, Իսրայելում իրավիճակը նույնպես բարդ է, կան շրջաններ, որոնք ևս հարվածի տակ են, այստեղ պարբերաբար օդային տագնապի ազդանշանն է միանում: Իսրայելի բնակչությունը, այդ թվում և հայ համայնքի ներկայացուցիչներից շատերը մտածում են արտագաղթելու մասին․․․
MediaHub-ի հետ զրույցում Իսրայելի հայ համայնքի ներկայացուցիչ Ալիկ Հակոբյանը նշեց, որ բնակելի շենքերին, տներին կից կան հաստ բետոնից պատրաստված թաքստոցներ, որոնք ձայնամեկուսացված են, իսրայելցիները դրանք անվանում են մադան։ Հայ համայնքի ներկայացուցիչներից շատերը դրանց մասին անգամ չգիտեին մինչ պատերազմական իրադարձությունների սկսվելը։
«Երեխաս շատ վախեցած է, ապրելով թե՛ Երևանում, թե՛ Կանադայում այդպիսի ձայներ չէինք լսել, անհանգստացած ենք երեխայի համար.... մտածում ենք արդեն հետ վերադառնալ Հայաստան»,– նշեց նա:
Ըստ նրա՝ այս ամենը կառավարությունների կռիվ է, պետություն պետություն իրար դեմ են տրամադրված, իսկ արդյունքում, ինչպես միշտ, տուժում է ժողովուրդը՝ թե՛ Իսրայելի, թե՛ Լիբանանի, թե՛ տարածաշրջանի։
«Թել Ավիվի երկինքը որերորդ օրն է կարմիր է, պայթյունների ձայները սարսափելի են, հակաօդային պաշտպանության համակարգերը, որ աշխատում են, մարդիկ դրանցից ավելի են վախենում, քանի որ չգիտեն` այդ պահին իրենց վրա են կրակում, թե իրենք են կրակում թշնամուն։ Մերձավոր Արևելքը ճգնաժամի մեջ է»,– նշեց նա։
Նշենք, որ հաշվի առնելով ստեղծված իրավիճակը, թե՛ Իսրայելում, թե՛ Լիբանանում հայ համայնքի բազմաթիվ ներկայացուցիչներ մտածում են արտագաղթելու մասին, Բեյրութում արդեն իսկ արտագաղթը նկատելի է, շատերը ծրագրում են վերադառնալ Հայաստան։
Հիշեցնենք, իսրայելական ավիացիան սեպտեմբերի 23-ից հարյուրավոր հարվածներ է հասցրել Լիբանանի հարավային հատվածներին: Այս գիշեր Իսրայելն ավիահարված է հասցրել Բեյրութի Կոլա թաղամասին, որտեղ հիմնականում քրիստոնյա և սուննի բնակչություն է: Շաբաթ օրը հայտնի դարձավ, որ իսրայելական բանակը պաշտոնապես հաստատել է Բեյրութին հասցված հարվածից հետո «Հըզբոլլահ» առաջնորդ Հասսան Նասրալլահի մահը։ Երեկ երեկոյան Բեյրութի կենտրոնում Իսրայելի ռազմաօդային ուժերի ինքնաթիռների` բազմահարկ շենքի թիրախային հարվածի հետևանքով սպանվել է Պաղեստինի ազատագրման ժողովրդական ճակատի ռազմական թևի ղեկավար Իմադ Ուդան։ Լիբանանի վարչապետի աշխատակազմից հայտնում են, որ գաղթականների թիվը կարող է հասնել 1 միլիոնի, իսկ այժմ գաղթականների թիվը արդեն հատել է 110.000-ը։
Մարիաննա Արամյան
