Տեսչականը «Արթկոսմեդ»-ում, որտեղ մարդ էր մահացել, ժամանակին բազմաթիվ խախտումներ էր արձանագրել

ՀԱՍԱՐԱԿՈՒԹՅՈՒՆ 16 Հոկտեմբեր, 2024 21:25

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հոկտեմբերի 8-ին հերթական մահվան դեպքն էր գրանցվել «Արթկոսմեդ» էսթետիկ վիրաբուժության կենտրոնում։

MediaHub-ը գրել էր, որ 56 տարեկան մի կին նշված բժշկական կենտրոնում պլաստիկ վիրահատության ենթարկվելու ժամանակ ունեցել է սրտի կանգ, ու քանի որ տվյալ կլինիկան չի ունեցել համապատասխան վերակենդանացման բաժանմունք և միջոցներ՝ պացիենտի վիճակը կայունացնելու, նրան ծայրահեղ ծանր ախտորոշմամբ տեղափոխել էին «Աստղիկ» բժշկական կենտրոն, բայց նրա կյանքը փրկել չի հաջողվել։ Սա, իրականում, լուրջ խնդիր է, որով պետք է զբաղվեն համապատասխան մարմինները, սակայն չեն զբաղվում կամ լավ չեն զբաղվում և մատների արանքով են նայում։

Հատկապես այս կլինիկայից շատ են դժգոհությունները, որ հայր և որդի Սամվել և Արթուր Սարգսյանները, իրականում, մարդկանց կյանքի հետ են խաղում, բազմաթիվ քաղաքացիներից կոնկրետ MediaHub-ն այս օրերին պատմություններ է լսել հենց իրենց կամ իրենց ծանոթ-բարեկամների անձնական փորձից, թե ինչպես են դիմել «Արթկոսմեդին» այս կամ այն պլաստիկ միջամտության հարցով և վիրահատությունից հետո խնդիրների և բարդությունների առջև են կանգնել։ Բայց էսթետիկ կենտրոնը, որ տեղակայված է պոլիկլինիկայի տարածքում, շարունակում է իրեն գովազդել և գովազդի հաշվին հաճախորդներ ներգրավել։ Հիշեցնենք, որ սրանից մեկ տարի առաջ էլ այս նույն կենտրոնում վիրահատության ժամանակ 31 տարեկան մի կին էր մահացել, բայց մինչ օրս ո՛չ վիրահատող բժիշկը, ո՛չ տվյալ բուժհաստատության տնօրեն Արթուր Սարգսյանը, ո՛չ կենտրոնը՝ ինքնին, որևէ պատասխանատվության չեն ենթարկվել։

Քննչական կոմիտեից MediaHub-ին հայտնեցին, որ մոտ մեկ տարի առաջ տեղի ունեցած այս դեպքով քրեական վարույթ է նախաձեռնվել, սակայն մինչ օրս սպասում են փորձագիտական կենտրոնի եզրակացությանը, որ հասկանան՝ տվյալ մահվան դեպքը իսկապե՞ս տեղի է ունեցել բժշկական սխալի հետևանքով, թե՞ ոչ։ Եզրակացությունը ստանալուց հետո նոր կորոշեն՝ կասեցնե՞ն տվյալ կլինիկայի գործունեությունը և որևէ մեկին կանչե՞ն պատասխանատվության, թե՞ ոչ։ Իսկ եզրակացությունը Աստված գիտե, թե երբ կգա ու այդ ընթացքում դեռ քանի հոգի իր կյանքն ու առողջությոuնը կվտանգի այս կլինիկայում։ MediaHub-ը այս առնչությամբ հետաքրքրվեց առողջապահության նախարարությունից, թե երբ է այս կլինիկային լիցենզիա տրվել և ինչ հիմքով։

Նախարարությունից մեզ հայտնեցին, որ իրենք «Արթկոսմեդ» անունով լիցենզավորված կազմակերպություն չունեն, այլ տվյալ հասցեում լիցենզավորված գործունեություն է ծավալում «Սամվել Սարգսյան և գործընկերներ» ՍՊԸ-ն, որը հենց «Արթկոսմեդ» էսթետիկ բժշկության կենտրոնն աշխատեցնող ընկերությունն է։ Ըստ ԱՆ-ի՝ «Սամվել Սարգսյան և գործընկերներ» ՍՊԸ-ն իր լիցենզիան ստացել է 2021 թվականին՝ «պլաստիկ վերակառուցողական և էսթետիկ վիրաբուժական սպասարկում իրականացնելու համար»։ Առողջապահության նախարարությունը լիցենզիան տվել է ու քաշվել մի կողմ, քանզի լիցենզիան ստանալուց հետո վերահսկողություն իրականացնելու գործառույթն արդեն ՀՀ առողջապահական և աշխատանքի տեսչական մարմինն է։

Նկատենք, որ այս տեսակի մասնավոր կլինիկաները, ինչպես մեզ պատմեցին առկա պրակտիկայից, լիցենզիա ստանալու պահին, սովորաբար, ներկայացնում են, որ բավարարում են ներկայացված պահանջներին, օրինակ՝ ունեն վերակենդանացման բաժանմունք, անհրաժեշտ սարքավորումներ և անձնակազմ, իսկ երբ ստուգող մարմինը հեռանում է, այդ ամենը վերանում է, քանզի ի վիճակի չեն, իրականում, պատշաճ վերակենդանացման բաժանմունք պահել։ Ուստի, մենք դիմեցինք տեսչական մարմնին՝ հասկանալու, թե վերջին անգամ ե՞րբ են ստուգումների գնացել «Արթկոսմեդ», ի՞նչ խախտումներ են արձանագրել, ի՞նչ է հետևել դրանց և ի՞նչ են պատրաստվում անել վերջին դեպքից հետո։

ՀՀ առողջապահական և աշխատանքի տեսչական մարմնից MediaHub-ին պատասխանել են, որ 2022 թվականին տեսչական մարմինը ստուգումներ է իրականացրել «Սամվել Սարգսյան եւ գործընկերներ» ՍՊԸ-ում, և ստուգման արդյունքում արձանագրվել են թերություններ, և 2022 թվականի մարտի 25-ին ՍՊԸ-ին տրվել է հանձնարարական (Կարգադրագիր) արձանագրված թերությունները վերացնելու մասին: 2022 թվականի սեպտեմբեր-հոկտեմբեր ամիսներին այս ընկերությունում Տեսչական մարմնի տեսուչների կողմից իրականացվել է վերստուգում, որի արդյունքում ընկերությանը 2022 թվականի հոկտեմբերի 03-ին տրվել է վերստուգման տեղեկանք:

2022 թվականին վերոնշյալ ՍՊԸ–ում ստուգման ժամանակ արձանագրվել են թվով 23 կետից բաղկացած խախտումներ:

Տեսչականից տեղեկացրին նաև, որ «Արթկոսմեդ» կլինիկան աշխատեցնող «Սամվել Սարգսյան եւ գործընկերներ» ՍՊ ընկերության վերաբերյալ Տեսչական մարմնում հարուցվել է եւս մեկ վարչական վարույթ՝ 2024 թվականի հոկտեմբերի 9-ին բժշկական կազմակերպության կողմից օրենսդրությամբ սահմանված պահանջների պահպանումը պարզելու նպատակով, որը դեռեւս ընթացքի մեջ է։

Ինչ վերաբերում է մեկ տարի առաջ այս նույն կլինիկայում արձանագրված մահվան դեպքին, ապա տեսչականից ասացին, որ մեկ տարի առաջ նշված ՍՊԸ-ում մահվան դեպքի վերաբերյալ տեղեկատվություն Տեսչական մարմնում չի ստացվել։