Պատերազմի, գաղթի չսպիացող ցավի, մայրերի ու բժիշկների սխրանքների մասին է «Վերջին արցախցիները» ֆիլմը
ՄՇԱԿՈՒՅԹՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Լրագրող Մարիամ Սարգսյանի «Վերջին արցախցիները» ֆիլմի կենտրոնում ոչ միայն վերջին պատերազմում ծնված երեխաներն են, այլև՝ մայրերը, որոնք հաղթահարեցին բոլոր այդ փորձություններն ու դժվարությունները։ Սեպտեմբերի 19-ին ինքը հարազատ քաղաքում էր, երբ սկսվեց պատերազմը։
«Ես ամենաշատը մտածում էի այն կանանց մասին, ովքեր երեխայի էին սպասում։ Քիչ չէին արդեն մեծ փորիկներով 7, 8 կամ 9 ամսական հղիները, որ հազիվ էին իջնում նկուղ։ Դժվար էր իրենց համար, որովհետև պետք է փրկեին ոչ միայն իրենց, այլև դեռ չծնված երեխաներին։ Մարտունու քաղաքապետ Ազնավուր Սաղյանի զոհվելու և ԱՄՆ-ից Մարտունի տեղափոխված Մարինե Չարշաֆյանի ծննդաբերության լուրը միաժամանակ հասավ մեր ապաստարան։ Մի կողմից սգում էինք Ազնավուրի մահը, մյուս կողմից՝ ուրախանում, որ Մարինեն բարեհաջող ծննդաբերել է»,- MediaHub-ին ասում է Մարիամը։
Սեփական աչքերով տեսածը՝ Մարիամը պիտի վավերագրեր։ Տեղահանվելուց հետո արցախցի լրագրողների հետ գործառույթ սկսեց մեդիանախաձեռնությունների կենտրոնը։ Մարիամին հնարավորություն ընձեռվեց աշխատել, տեսածը՝ դարձնել ֆիլմ։
«Նկարեցի 4 հերոսների։ Իմ հեղինակած ֆիլմում նրանք պատմում են իրենց անցած դժվարին ճանապարհի, բայց և բժիշկների օգնությամբ՝ հաջող ծննդաբերությունների մասին։ Դեղորայքի սակավ պաշարի պատճառով որոշներին կես դեղաչափով են անզգայացրել, մյուս կեսով՝ այլ հղիի։ Որոշ հղիներ էլ պատմում են, որ ծննդաբերության ցավերը վրա է հասել գաղթի ճանապարհին։ Ֆիլմը դիտողներն անմիջապես հասկանում են, թե ինչերի միջով են անցել այդ կանայք»,- ասում է մեր զրուցակիցը։
«Վերջին արցախցիները» ֆիլմի 4 հերոսուհիներից 3-ն առաջնածին են։ Շատերը կհասկանան, թե ծննդաբերելուց հետո փոքրիկներն իրենց տներում մնալու հնարավորություն չեն ունեցել։ Դուրս են գրվել, միանգամից ճանապարհվել Հայաստան։
«Ի սկզբանե այս ֆիլմը տեղի ունեցած էթնիկ զտման մասին է։ Հիմքում եղել է այն նպատակը, որ Հայաստանից դուրս դիտողները հասկանան այն ողջ իրականությունը, որ տեղի է ունեցել Արցախում։ Ֆիլմում հնչում է Արցախի բարբառը, դրա համար մենք օգտագործել ենք անգլերեն և ռուսերեն ենթագրեր»,- հավելում է Մարիամ Սարգսյանը։
Հունան Թադևոսյան
Առավել մանրամասն` այստեղ.
https://t.me/armenia24live
