Գյումրիում իրադարձությունները պայմանավորված են մոտալուտ խորհրդարանական ընտրություններով, իշխանությունները փորձում են քաղաքը վերահսկելի դարձնել. Համբարյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գյումրիի քաղաքապետարանում զարգացումների նպատակը մեկն է․ զավթել իշխանությունը՝ արհամարհած ունենալով հանրության և ժողովրդի ընտրության արդյունքները, Aysor.am-ի հետ զրույցում ասաց գյումրեցի քաղաքագետ Գագիկ Համբարյանը՝ անդրադառնալով Գյումրիի քաղաքապետի հրաժարականին և դրա շուրջ ծավալվող իրադարձություններին։

«Բայց ամեն վայրում ուրույն ձևով է իշխանությունը զավթվում: Վանաձորում տեսաք, թե ինչ արեցին. ընտրված քաղաքապետին կալանավորեցին երկու տարուց ավելի։ Իսկ իրենց սպասարկող «Լուսավոր Հայաստան» կուսակցության բողոքի հիման վրա էլ ինչ-որ գործընթացներ սկսեցին, որի արդյունքում Վանաձորի ավագանին գրեթե չաշխատեց։ 

Լրիվ այլ գործընթաց տեղի ունեցավ Ախուրյանում, երբ ուղղակիորեն Ախուրյանի ընդդիմադիր ավագանու անդամներից մեկին պարտադրեցին իրենց կողմն անցնել: Իսկ մյուս անդամը, ով չէր ուզում անցնել, հրաժարական տվեց։ Անիում, Մարալիկում այլ մեթոդներով իշխանազավթում տեղի ունեցավ։ Գյումրիում ավելի լկտի մեթոդներով իշխանազավթում տեղի ունեցավ։ Ենթադրում եմ, որ Հայաստանի պատմության մեջ այդպիսի բան չի եղել, որ ապօրինի հող սեփականաշնորհելու համար մարդկանց տանեն կալանավորելու։ Առավել ևս՝ փորձեն կալանավորել նախկին քաղաքապետ Սամվել Բալասանյանին, ով առողջական լուրջ խնդիրներով բուժում է ստանում ԱՄՆ-ում։ Ես Բալասանյանի կողմնակիցը չեմ, նրա վարած քաղաքականությունը հաճախակի եմ քննադատել։ Բայց ես առաջին անգամ եմ տեսնում, որ հող սեփականաշնորհելու համար մարդուն տանեն կալանավորման։ Սա գործող իշխանությունների հերթական անօրինական դրսևորումներից մեկն էր. ձերբազատվեցին այն մարդուց, ում թիմին գյումրեցին տարիներ առաջ վստահել էր՝ ձևավորելու քաղաքային իշխանությունը»,-ասաց Գագիկ Համբարյանը։

Քաղաքագետի գնահատմամբ՝ այս ամենը պայմանավորված է մոտալուտ խորհրդարանական ընտրություններով, որպեսզի իրենք կարողանան Գյումրին վերահսկելի դարձնել։

«Բայց ես նշեմ, որ նույնիսկ վարչապետ ունենալով՝ նույն քպ-ականներն ընդամենը երեք տարի առաջ պարտություն կրեցին Գյումրիում ՏԻՄ ընտրությունների արդյունքում։

Այնպես որ, նույն Նիկոլը 3 տարի առաջ էլ էր վարչապետ, նույն քպ-ականներն ավելի միահամուռ և ուժեղ թիմով հանդես էին գալիս իրենց թեկնածուով, բայց Գյումրիում ՏԻՄ ընտրությունների ժամանակ նրանք զբաղեցրին երկրորդ տեղը և չկարողացան քաղաքապետ ունենալ»։

Շիրակի մարզի քպ-ական թիմում, ըստ քաղաքագետի, կան բազում բևեռներ։

«Ամենաանհաջող թեկնածուին են ընտրել որպես քաղաքապետի թեկնածու: Տեսնենք, թե ինչ կլինի: Քաղաքապետի ընտրությունների արդյունքները նաև կախված են այն բանից, թե ինչ թիմեր են մասնակցելու դրան։ ՔՊ-ականների համար կարևոր է՝ անել ամեն ինչ, որպեսզի ՏԻՄ ընտրություններին մասնակցեն այնպիսի քաղաքական ուժեր, որոնք շատ թույլ են իրենց էությամբ, կամ էլ աֆիլացված կապ ունեն այս իշխանությունների հետ»։