Հայկական բանակը հաղթանակած ու մրցունակ է. Սեյրան Օհանյան

Հայկական բանակի մարտունակությունը ցույց է տալիս, որ այն տարածաշրջանում մրցունակ բանակ է: Եռաբլուր զինվորական պանթեոնում լրագրողների հետ զրույցում այս մասին ասաց ՀՀ պաշտպանության նախարար Սեյրան Օհանյանը: «Մեր բանակը նաև հաղթանակած բանակ է, որն ամեն օր մեր սահմաններում, Արցախում, շփման գծում իր առջև դրված քննությունը հանձնում է գերազանց կերպով»,- «Արմենպրես»-ի հաղորդմամբ՝ նշեց նախարարը:

Սեյրան Օհանյանը խորհրդանշական է համարում, որ երկրի ղեկավարությունը բանակի օրն առաջինն այցելում է Եռաբլուր՝ մարտական ընկերներին և նրանց հարազատներին շնորհավորելու: «Այստեղ յուրաքանչյուրի անունը լսելիս՝ յուրաքանչյուրիս մարմնով սարսուռ է անցնում և ցավն ու սխրանքը շաղախվում ու դառնում են հպարտություն մեր բանակի, մեր մարտական ընկերների համար, կարծրանում և դառնում պատասխանատվություն այսուհետ սխալներ չգործելու համար»,- եզրափակեց նախարարը:

Հայաստանի Հանրապետությունը և աշխարհասփյուռ հայությունը հունվարի 28-ին նշում է հայկական բանակի կազմավորման 24-րդ տարեդարձը: 1992թ. հունվարի 28-ին Կառավարությունը ընդունեց «Հայաստանի Հանրապետության Պաշտպանության նախարարության մասին» պատմական որոշում` դրանով իսկ իրավականորեն ազդարարելով Հայոց Ազգային բանակի ստեղծումը: 1992թ.-ի մայիսին պաշտպանության նախարարությունը սկսեց առաջին զորակոչը հանրապետության տարածքում` հիմք դնելով բանակը ժամկետային զինծառայողներով համալրելու կայուն ավանդույթին: