Երևանի քաղաքապետարանի «բարեփոխած» տրանսպորտը, պարզվում է, նոր ու համակարգային խնդիրներ է առաջացրել տրանսպորտից օգտվողների համար։ Ընդ որում, այս խնդիրները նախկինում եղած խնդիրների ծնունդ ու շարունակություն են, քանի որ, պարզվում է, մինչ նոր համակարգի ներդրումը՝ QR կոդով վճարում, վարորդները լրիվ այլ պայմաններով և այլ մոտիվացիայով են աշխատել, հիմա այդ պայմանները վերացել են, մոտիվացիան՝ նույնպես։ Իսկ մոտիվացիան մեկն էր՝ գումարը, որը գրպանում էին ավտոբուսի վարորդները քաղաքացիների վճարած 100 դրամներից։
Նրանք քաղաքապետարանի սահմանած «պլանը» տալուց հետո մնացած ամբողջ գումարը պահում էին իրենց, և որպեսզի շատ գումար մնար իրենց, աշխատանքային ժամից ավել էին մնում ու մի քանի անգամ ավելի շատ էին երթուղի դուրս գալիս, որ իրենց աշխատավարձից դուրս ավել գումար տուն տանեին։ Սա ոչ միայն մեր մենթալիտետի խնդիր է, քանզի մենք՝ հայերս, սովոր ենք «լևի» փող աշխատելուն, այլև քաղաքապետարանի կողմից չհամակարգված, կիսատ-պռատ լուծումների տալու հետևանք է։
MediaHub-ն այսօր անդրադարձել էր այս խնդրին՝ ներկայացնելով վարորդների դժգոհությունն ու խոստովանությունը, թե ինչպես էին իրենք կողքից փող աշխատում։
Երևանի քաղաքապետարանի Տրանսպորտի վարչության պետ Վազգեն Հարությունյանը մեզ հետ զրույցում չհերքեց, որ կան անբարեխիղճ վարորդներ, որոնք գրպանում են հավաքագրված գումարի մի մասը և կա, իսկապես, խնդիր, որին պետք է լուծում տան։
