Արցախը կգործարկի բազմազավակ ընտանիքների համար բնակարանաշինության նոր ծրագիր

 Այս տարի Արցախում կմեկնարկի 5 և ավելի երեխաներ ունեցող ընտանիքների համար բնակելի տների կառուցման ծրագիրը: Այս մասին հունվարի 28-ին կայացած մամուլի ասուլիսին տեղեկացրել է ԼՂՀ քաղաքաշինության նախարար Կարեն Շահրամանյանը՝ ներկայացնելով 2015 թվականին նախարարության կողմից իրականացված աշխատանքները:

«Արմենպրես»-ի հաղորդմամբ՝ քաղաքաշինության նախարարը մանրամասնել է, որ անցյալ տարի «Հայաստան» համահայկական հիմնադրամի կողմից սկսվել է 6 և ավելի երեխաներ ունեցող ընտանիքների համար բնակելի տների կառուցման ծրագիրը, որի շրջանակում կառուցվում են 21 բնակելի տներ:

Անդրադառնալով կապիտալ ներդրումների ծրագրով բնակարանաշինության ոլորտին, Կ. Շահրամանյանը տեղեկացրել է, որ ոլորտին անցյալ տարի հատկացվել է 10 միլիարդ 92 մլն դրամ գումար, որից բնակելի տների վերանորոգման նպատակով 7 մլրդ 75 մլն դրամ գումարի շինանյութ է տրամադրվել 788 ընտանիքների: Բացի այդ, կառուցվել 21 բնակելի տուն , ընթացքի մեջ են ևս 56-ի կառուցման շինաշխատանքները:

Վերանորոգվել է 34 և ընթացքի մեջ է 2 բնակելի տան վերանորոգումը: Վերանորոգման կամ գնման դիմաց փոխհատուցում է տրամադրվել 89 բնակարանի համար: «Բնակարանաշինությունը ծավալվել է հիմնականում հետևյալ ուղղություններով. զոհված ազատամարտիկների ընտանիքների բնակարանների վերանորոգում և կառուցում, ԼՂՀ-ում ծնելիության և բազմազավակության խթանման միջոցառումների իրականացման ծրագրի շրջանակներում բնակարանների կառուցում և վերանորոգում, այլ սոցիալական խմբերին պատկանող ընտանիքների բնակելի տների վերանորոգում:

Բացի այդ, ԼՂՀ արտաբյուջետային միջոցների հաշվին պաշտպանության բանակի սպայակազմի համար ԼՂՀ Մարտակերտի շրջանի Մատաղիս գյուղում կառուցվում է 24 բնակարանով բնակելի շենք՝ 579 մլն դրամ ընդհանուր արժեքով»,- ասել է Կ. Շահրամանյանը։