Օդամղիչ զենքերից կատարվող կրակոցների մրցաշարում Զավեն Իգիթյանը 7-րդ տեղում է

 Գերմանիայի Մյունխեն քաղաքում մեկնարկել է օդամղիչ զենքերից կատարվող կրակոցների ''International air gun competition'' մրցաշարը, որին Հայաստանից մասնակցում է 10 մարզիկ: «Արմենպրեսի» հաղորդմամբ, ՀԱՕԿ լրատվության բաժնի տեղեկատվության համաձայն, 10 մետր օդամղիչ ատրճանակ (60 կրակոց) երիտասարդների պայքարում Զավեն Իգիթյանը խոցել է 573 միավոր եւ 6-րդ հորիզոնականով անցել եզրափակիչ փուլ, սակայն եզրափակիչում Իգիթյանին չի հաջողվել բարելավել դիրքերը: Հայ մարզիկը եզրափակիչ 8-նյակում մրցելույթն ավարտել է 7-րդ տեղում:

Նույն վարժությունում Հայաստանի մյուս մասնակիցը ` Բենիկ Խլղաթյանը, գրավել է 28-րդ տեղը` խոցելով 561 միավոր:

 10մ օդամղիչ հրացան (60 կրակոց) տղամարդկանց վարժությունում 85 մրցակիցների մեջ Սուրեն Բերյանը գրավել է 17-րդ տեղը` խոցելով 626,4 միավոր, Հրաչիկ Բաբայանը 626,0 միավորով գրավել է 20-րդ տեղը, Քրիստիան Լաուերը 618,5 միավորով` 70-րդ:

Նույն մրցաձեւում երիտասարդների պայքարում 61 մրցակիցների մեջ Վրեժ Թորոսյանը գրավել է 22-րդ տեղը` խոցելով 618.3 միավոր, ինչը ռեկորդային է նրա համար: Հայկ Բաբայանը գրավել է 45-րդ տեղը` խոցելով 612.8 միավոր:Կանանցից մեծահասակների պայքարում 74 մրցակիցների մեջ Էլմիրա Կարապետյանը գրավել է 59-րդ տեղը` խոցելով 369 միավոր:

Հունվարի 29-ին կմեկնարկի 10մ օդամղիչ հրացան, (40 կրակոց) կանանց վարժությունը, որտեղ հանդես կգան Իրինա Լաուերը (Աղաջանյան) եւ Մարիամ Միքայելյանը: Երիտասարդների պայքարում հանդես եկող Վրեժ Թորոսյանը, Հայկ Բաբայանը, Զավեն Իգիթյանն ու Բենիկ Խլղաթյանը հունվարի 29-ին կկրկնեն վարժությունները: