Ուզում ենք վերադառնալ Հայաստան․ Հալեպում իրավիճակն ավելի է սաստկանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Ի՞նչ են մտածում Հայաստանում՝ Հալեպի հայերին տարհանելու համար»,- MediaHub-ի հետ զրույցում առաջինն է, որ հարցնում են ահաբեկչությունների էպիկենտրոն դարձած Հալեպից։

«Քաղաքից դուրս գալու ելք չկա, օդանավակայանում թռիչքներ չկան։ Գնալով իրավիճակն ավելի է սաստկանում, ռմբակոծությունների ձայները չեն դադարում, հաճախ այն մեզանից ավելի մոտ է լսվում, բայց հիմնականում ռմբակոծվում է քաղաքի հյուսիսային հատվածը»,- MediaHub-ի հետ զրույցում ասում է հալեպաբնակ Գևորգ-Հովհաննես Ճոսլակյանը։ 

Գևորգի խոսքով՝ Հալեպ-Դամասկոս գլխավոր մայրուղին փակ է, այլընտրանքային ճանապարհները՝ վտանգավոր։ Հալեպահայերը հույս ունեն, որ ՀՀ կառավարությունը քայլեր կձեռնարկի հայերին ապահով տարհանելու հարցում։

«Հոսանք տալիս են հովհարային անջատումներով, ջուրը՝ ժամային գրաֆիկով, հացի խնդիրը մասամբ լուծվել է։ Էս պահին էլեկտրականություն կա, դրա համար եմ կարողանում խոսել ձեր հետ։ Մեծի Տանն Կիլիկիո կաթողիկոս Արամ Ա Վեհափառ հայրապետի հայրախնամ հովանավորությամբ՝ հալեպահայերն առանց խտրականության նյութական օժանդակություն պետք է ստանան։ Հայկական համայնքն աշխատում է համակարգված, սակայն, մեզ ավելի շատ խաղաղ կյանք է անհրաժեշտ, ելք դեպի Հայաստան։ Շատերը գուցե նախընտրեն այլ երկիր, բայց ես իմ ընտանիքով ուզում եմ վերադառնալ հայրենիք»,- ասում է նա։ 

MediaHub-ը կապ հաստատեց նաև Իսաբել Դանգուրյանի հետ։ Կինը երեխաների հետ վերջերս էր Հայաստանից տեղափոխվել հայրենի Հալեպ։ Սակայն, իրավիճակով պայմանավորված՝ հայտնվել է անելանելի վիճակում։

«Մի բան պետք է անել, այսպես այլևս անհնար է։ Հալեպի հայերը պետք է տարհանվեն, այստեղ անապահով է, ու վերջը չի երևում։ Հարևան Լիբանանում նորից վերսկսվել է պատերազմը։ Մերձավոր Արևելքում քաոս է, ուզում ենք վերադառնալ Հայաստան: Հալեպը՝ Թուրքիայի հովանավորությամբ, հայտնվել է ապստամբների և արմատական խմբավորումների ձեռքում»,- եզրափակեց Իսաբելը։

Հետևեք մեզ՝ այստեղ