«Կոլեկտիվ»՝ տարօրինակ ու զվարճալի կերպարներով. Արման Մարությանը նոր սիթքոմ է նկարում
ԼԱՅՖ
Անսովոր ձևաչափ ու լիովին նոր շունչ, յուրահատուկ ու զվարճալի կերպարներ...
Դեկտեմբերի 8-ից՝ Արմենիա TV-ի եթերում, յուրաքանչյուր շաբաթ և կիրակի հեռուստադիտողը կտեսնի նոր, զվարճալի սիթքոմ՝ «Կոլեկտիվ», որտեղ հերոսներից ամեն մեկն իր տարօրինակությունն ունի:
Tert.am Life-ը ներկա է եղել ֆիլմի նկարահանումների ընթացքին, զրուցել դերասանների ու պրոդյուսերի հետ:
Պրոդյուսեր Գրետա Բարսեղյանը վստահեցնում է՝ հեռուստադիտողը կտեսնի տարբերվող կոնտենտ, որով կարելի է երեկոն անցկացնել ուրախ, թեթև ու հաճելի:
«Օֆիսում աշխատող կերպարների մասին է, որոնք շատ տարբեր են ու գունավոր: Գլխավոր հերոսին մարմնավորում է Պոնչը, թիմին միացել են շատ տաղանդավոր դերասաններ: Սիթքոմը տարիքային բոլոր խմբերի համար է: Սիթքոմի առաջին եթերաշրջանը բաղկացած է 16 մասից»,- մեզ հետ զրույցում նշեց պրոդյուսերը:
Սիթքոմը պատմում է տնտեսական ապրանքերի արտադրանքով ու վաճառքով զբաղվող մեծ ընկերության երևանյան մասնաճյուղի աշխատանքային օրվա մասին: Աշխատակիցները ստիպված են հանդուրժել էքսցենտրիկ ու մանկամիտ տնօրենի քմահաճույքները և կատակները: Աշխատանքային առօրյան հարուստ է բամբասանքներով, սիրային կրքերով, վեճերով, զվարճանքներով ու խաղերով:
Ռեժիսորը Արման Մարությանն է, ով հեռուստադիտողին արդեն հայտնի է իր մյուս գործերով: Սցենարի հեղինակներն են Վան Գրիգորյանը, Գառնիկ Մակվեցյանն ու Էրիկ Սուքիասյանը: Հերոսներին մարմնավորում են Պոնչը, Միլենա Վարդանյանը, Բորիս Բաղդասարովը, Մերի Մովսեսյանը, Սամվել Բաղինյանը և այլք:
Դերասան Պոնչը մեզ հետ զրույցում վստահեցրեց, որ Հայաստանում նմանատիպ ոճով նկարահանված սիթքոմ չկա:
«Համենայն դեպս ես չեմ հանդիպել: Շատ լավ սցենար է գրված: Ես այդ գրասենյակի ղեկավարն եմ: Այս կոլեկտիվում բոլորը բոլորից ավելի տարօրինակ են ու անկանխատեսելի։ Այս դերը տարբերվում է իմ մյուս բոլոր դերերից նախ վիզուալ, որովհետև ես հատուկ այս սիթքոմի համար սափրվել եմ ու թողել եմ միայն բեղեր, ու ասեմ ավելին, քաղաքում այսպես եմ լինելու երկար ժամանակ»,- պատմեց Պոնչը:
Նա նշեց, որ չի ցանկանում շատ գաղտնիքներ բացել, բայց խոստանում է, որ նորություն է թե՛ սցենարական առումով, թե՛ դերասանական կազմի:
«Լիքը նոր դերասաններ կան, հանրությանը ոչ այնքան հայտնի, բայց շատ տաղանդավոր: Հուսով եմ կսիրվի: Շատ ուրախ եմ, որ նորից աշխատում եմ այս աշխատակազմի հետ, գլխավորությամբ՝ Արմանի Մարությանի, ում հետ աշխատելն ուղղակի գերագույն հաճույք է: Պրոֆեսիոնալ թիմ է, պրոֆեսիոնալ աշխատանք»,- նշեց Պոնչը:
Դերասանուհի Մերի Մովսեսյանն էլ մեզ հետ զրույցում պատմեց, որ մարմնավորում է Անիի կերպարը:
«Երկար ժամանակ դադար եմ ունեցել ու ինչ առաջարկներ լինում էր՝ հրաժարվում էի: Բայց հենց այս նախագծից առաջարկը ստացա, միանգամից համաձայնեցի, որովհետև նախկինում աշխատել եմ այս անձնակազմի հետ ու շատ եմ իրենց սիրում: Գիտեի, որ պրոֆեսիոնալ միջավայր է ստեղծվելու:
Երբ սցենարը ուղարկեցին, կարդացի, ծանոթացա, հասկացա, որ ինձ շատ հետաքրքիր է, որովհետև նախկինում իմ կատարած դերերից տարբերվում էր»,- նշեց դերասանուհին ու հավելեց, որ սա իր առաջին փորձն է սիթքոմում:
«Անիի կերպարը մի քիչ պարադոքսալ է, ինքը գտնվում է սիրային եռանկյունու մեջ ու ինձ դեռ շատ հետաքրքրել է, որովհետև շատ գունեղ կերպար է:
Իրականում վախերս շատ էին սկզբում, որովհետև դրամայից հետո ես հայտնվել եմ լրիվ նոր միջավայրում, ինձ թվում էր շատ ավելի բարդ կլինի, բայց շնորհիվ պրոֆեսիոնալ անձնակազմի, շատ արագ ինտեգրվեցի ու հասկացա, ինչ է ինձնից պահանջվում»,- պատմեց Մերի Մովսեսյանն, ում խոսքով՝ ռեժիսորի հետ աշխատանքը շատ հեշտ ու արագ է տրվում:
Դերասանուհին՝ խոսելով կուրիոզ դեպքերից, պատմեց, որ մեկ անգամ նկարահամնամ հրապարակում հասցրել է ինքնագնահատականը վատանալ:
«Իրականում կադրից դուրս շատ ավելի ծիծաղելի է ամեն ինչ անցնում, որովհետև բոլորը հումորով են: Բոլոր կերպարները տարբեր բնավորություններով ու շատ հետաքրքիր են, վստահ եմ՝ հանդիսատեսը կսիրի բոլորին»- ամփոփեց Մերին:
