Նիկո՛լ, Լևոնից, Սերժից ու Ելցինից լավ տղա չլինես, տերերդ քեզ տանելու են․ Էդուարդ Շարմազանով

Հայ ժողովուրդը, Հայաստանի քաղաքական էլիտան, մտավորականությունը, հավաքական հայն այս պահին պարտված են թուրքական տրոյական ձիուն։ Ժողովուրդների պատմությունը վերելքների ու վայրէջքների, հաղթանակների ու պարտությունների պատմություն է։ Այս փուլը, մեր ժողովրդի և մեր բոլորի, յուրաքանչյուրի անձնական պատմության մեջ այս վերջին տարիները պարտության ժամանակաշրջան են։ Սա շատ խոր հարց է, որն ունի բազմաթիվ շերտեր։ Եթե իշխանափոխությունը հնարավոր լիներ, կարվեր։ Իհարկե, մեր քաղաքացիները կարող են սլաքներն ուղղել ընդդիմության, նախկին ղեկավարների, ազգային էլիտայի, եկեղեցու ուղղությամբ, պնդել, թե լավ չեն աշխատել։ Այո՛, եթե Նիկոլ Փաշինյանի թրքահպատակ ռեժիմն այսօր կառավարում է Հայաստանում, հայաթափել է Արցախը, հրաժարվում է ազգային ինքնությունից, բնականաբար, ձախողել ենք բոլորս։ 168TV-ի «#ՕրաԽնդիր» հաղորդման ժամանակ նման կարծիք հայտնեց ՀՀԿ գործադիր մարմնի անդամ Էդուարդ Շարմազանովը:

«Չի կարելի ասել, թե ընդդիմությունը ոչինչ չի արել։ Ոմանք լուրջ դեմքով հարցնում են՝ ինչո՞ւ չի ստացվել, այսպես կամ այնպես պետք է անեին։ Սերժ Սարգսյանը 2018 թվականի դեպքերի մասին ասել է, որ ինքը պարտվել է ոչ թե Նիկոլին, այլ ավելի հզոր ուժերի, այդ թվում՝ նաև արտաքին։ Հիմա մենք այս փուլում, ազգային միտքն ու ուժերը, ընդդիմությունն ու ժողովուրդը, Արցախն ու Եռաբլուրը, Ծիծեռնակաբերդն ու Սարդարապատը սրբություն համարող մարդիկ պարտվել են ոչ թե Նիկոլ Փաշինյանին, այլ օտար, ավելի կոնկրետ՝ թուրք-բրիտանական ուժերին։ Նիկոլ Փաշինյանն ու իր ռեժիմն ընդամենը խամաճիկներ են։ «Մաշինա վրեմենին» խորհրդային տարիներին՝ 70-ականներին, մի լավ երգ ուներ՝ «Խամաճիկներ»։ Շատերն այն ժամանակ ասում էին, թե դա այն ժամանակվա Կենտկոմի մասին է, բայց երբ հիմա նայում ես, կարծես նիկոլական ռեժիմի մասին լինի։ Տիկնիկավարները նրանց դրսից կառավարում են»,- ասաց քաղաքական գործիչը:

«Պետք չէ մտնել էմոցիոնալ դաշտ, մենք պետք է սթափ դատենք և հասկանանք, որ, այո՛, ժողովուրդների պատմության մեջ նման դրվագներ լինում են։ Մենք առաջին նման ժողովուրդը չենք։ Հայ ժողովուրդն առաջին անգամ չէ, որ նման փուլի մեջ է։ Միշտ էլ պայքարն ազգայինի ու ապազգայինի միջև է։ Մեր հազարամյա պատմության ընթացքում պայքար է եղել ազգայինի ու ապազգայինի, անկախի և օտարամոլի միջև։ Այս փուլում օտարամոլն ու ապազգայինը ժամանակավորապես հաջողություն են գրանցել ազգայինի և անկախականի նկատմամբ։ Ընդդիմության երկարաժամկետ և ամենագլխավոր խնդիրը պետք է լինի Հայաստանի պետականության ազգային նկարագրի փշրանքների պահպանումը, հայկական անկախ պետականության մոտալուտ կործանումը թույլ չտալը»,- նշեց ԱԺ նախկին փոխնախագահը:

Շարմազանովի կարծիքով՝ այս նպատակների համար գործիք պետք է լինի Նիկոլ Փաշինյանի ռեժիմի հրաժարականը, քանի որ նրա ռեժիմով ՀՀ դասական իմաստով չի կարող լինել.

«Նիկոլ Փաշինյանը ո՛չ Լևոն Տեր-Պետրոսյանից, ո՛չ Սերժ Սարգսյանից, ո՛չ Բորիս Ելցինից, ո՛չ էլ շատ այլ մարդկանցից է ազդեցիկ գործիչ։ Պետք չէ նրան գերագնահատել։ Երբ լինեն աշխարհաքաղաքական և ազգային հնարավոր պայմաններ, նա կգնա։ Պատերազմից հետո նա մի քանի օր ո՞ւր էր կորել, թաքստոցներում չէ՞ր։ Ո՞ւր էր իր խմբակցությունը։ Այսինքն, նույն մարդը տարբեր իրավիճակներում տարբեր վարքագիծ է ցուցաբերել։ Պետք չէ ասել, թե նա չի գնա։ Կգնա, եթե դրա համար պայմաններ լինեն։ Ընդդիմության խնդիրը պետք է լինի այդ պայմանները մոտեցնելը»:

«Նիկոլ Փաշինյանն իշխանության է բերվել ոչ թե հայ ժողովրդի ընդվզման, այլ օտար ուժերի կողմից հայ ժողովրդին մանիպուլացնելու արդյունքում։ Հետևաբար՝ առանց աշխարհաքաղաքական կենտրոնների հետաքրքրվածության՝ Նիկոլ Փաշինյանի իշխանությունը չի կարող հեռանալ։ Ինչպես նրան բերել են, այդպես էլ պիտի տանեն։ Մեր առաջնային խնդիրը պետք է լինի ոչ թե անձի, այլ երևույթի դեմ պայքարելը»,- ամփոփեց Էդուարդ Շարմազանովը:

Մանրամասները՝ տեսանյութում