Պարապ մարդու գո՞րծ, թե՞ պատրաստություն արտահերթ ընտրություններին

Առավոտը սոցիալական ցանցերում սկսվեց վարչապետի պաշտոնը զբաղեցնող Նիկոլ Փաշինյանի տարօրինակ ակտիվությամբ։ Մարդ, ով ի պաշտոնե պետք է այնքան զբաղված լինի, որ սոցցանցերում թրև գալու ժամանակ չունենա, մի քանի ծավալուն գրառումներ էր արել՝ արձագանքելով իր ֆեյսբուքյան էջում հնչող հարցերին։

Փաշինյանն անդրադարձել է այն դիտարկմանը, թե իր այս ակտիվությունը կապված է ընտրությունների հետ: «Վստահ եմ, որ Հայաստանի ոչ մի առաջնորդ պաշտոնապես ու ոչ պաշտոնապես այնքան բնակավայրեր չի այցելել, որքան ես: Ըստ էության ամեն տարի: Եկեք վերադառնանք և տեսնենք, թե այդ այցերն ինչ մեկնաբանություններով են ուղեկցվել: Շատերը դա կապել են արտահերթ ընտրությունների հնարավորության հետ: Այս առումով ոչ մի նոր բան չկա: Չնայած, իմ այդ այցերը, շփումներն ընտրությունների հետ կապ ունե՛ն: Ահավոր վատ կզգամ, եթե մարդիկ ասեն, որ ընտրությունից ընտրություն եմ գյուղ կամ մարզ գնում»,- գրել է Փաշինյանն ու հավելել. «Սոցիալական ցանցերում իմ ակտիվությունը երբեք չի նվազել: Նախորդ տարի մի քանի ժամ ուղիղ եթերում պատասխանում էի քաղաքացիների հարցերին, հարյուրավոր գրառումներ, տեսանյութեր եմ հրապարակել: Գրեթե երկու ամիսը մեկ ասուլիս եմ տալիս, ելույթներ ունենում: Ինչո՞ւ, որովհետև մարդկանց հետ խոսելն իմ պարտքն է, մարդիկ իմ գործատուն են և ես պետք է կիսվեմ նրանց հետ, պատասխանեմ նրանց հուզող հարցերին: Սա է ժողովրդավարության էությունը»:

ՔՊ առաջնորդը, մեղմ ասած, կեղծում է, եղել են շաբաթներ, երբ նա որևէ գրառում չի արել սոցիալական ցանցերում։ Իսկ վերջին աննախադեպ ակտիվությունը, ըստ վերլուծաբանների, կապված է արտահերթ քաղաքական գործընթացների հետ, որոնք սպասվում են, և իշխանությունը տենդագին պատրաստվում է։

Օրերս էլ Փաշինյանը հրապարակել էր իր էջի դիտելիության հերթական ցուցանիշները։ «Այս ծավալի հանրային հաղորդակցություն կարծում եմ երբեք չեմ ունեցել, նույնիսկ Հեղափոխության օրերին»,- գրել էր նա:

Էլեն Մուրադյան