Պերմյակովի գործով դատական նիստ. գործով անցնող վկաների բոլոր ցուցմունքները՝ մեկ նյութում

Գյումրիում Ավետիսյանների ընտանիքի անդամների սպանության մեջ մեղադրվող ռուս զինծառայող Վալերի Պերմյակովի գործով հունվարի 29-ի դատական նիստին հարցաքննվել են գործով անցնող վկաները:

Նիստի սկզբում, սակայն, Ավետիսյանների ընտանիքի դուստրերը` Լուսինե Ավետիսյանը և Անահիտ Կոշտոյանը, նաև ընտանիքի փեսան` Եգոր Ադամյանը, հոգեբանական ծանր վիճակով պայմանավորված՝ միջնորդել են դատարանին լրացուցիչ հարցաքննություն չիրականացնել և հրապարակել իրենց նախաքննական ցուցմունքները: Դրանցում խոսվում էր Ավետիսյանների ընտանիքի, նրանց տանը հայտնաբերված բջջային հեռախոսների և հագուստների մասին:

Որպես վկա հարցաքննվել է նաև Ավետիսյանների հորեղբոր աղջիկը` Կարինե Ավետիսյանը, ով նրանց հետ բնակվում էր միևնույն բակում: Նա պատմել է, որ առավոտյան 06:20-ին ուժեղ ձայն է լսել` «գմփոց», և նրան թվացել է, թե երկրաշարժ է: Նա լույսը վառել է, նայել առաստաղին, նկատել, որ լամպը չի շարժվում, ոչ մի արտառոց բան բակում չի նկատել. եղել է մութ, Ավետիսյանների տան լույսը մարած է եղել, ոչ մի ձայն չի լսվել:

Ավելի ուշ նա սովորականի նման որոշել է գնալ աշխատանքի և տեսել է  բակում ընկած մի թաշկինակ: Դեպքի մասին իմացել է աշխատանքի վայրում: Նա տեղեկացրել է, որ ամեն գիշեր դուռը պարտադիր փակել են, որը բացելը դրսից շատ դժվար է: Այդուհանդերձ, առավոտյան դուռը բաց տեսնելով` ոչինչ չի կասկածել:

Վկայություն է տվել Միասնիկյան 184 հասցեում գտնվող խանութի աշխատող Ռուզաննա Հակոբյանը: Նա նշել է, որ այդ օրն աշխատանքի է գնացել առավոտյան ժամը 10-ին ու 1-1,5 ժամ անց աղմուկ է լսել, խանութ է մտել մահացած Հասմիկ Ավետիսյանի քույրը` Ռիտա Ավետիսյանը ու խնդրել զանգել շտապօգնություն: Փաստաբանների հարցին ի պատասխան` վկան նշեց, որ արտառոց բան չի նկատել, իսկ Ավետիսյանները սովորական մարդիկ են:

Վկայություն է տվել նաև շտապօգնության բուժքույրը` Գայանե Մելքոնյանը:  Նա նշել է, որ կանչը գրանցվել է 12:15-ին` որպես գազից թունավորման ահազանգ: Երբ տուն են մտել, տանն այլ մարդ չի եղել, իսկ ընտանիքի անդամները մահացած են եղել: Ավետիսյանների հարսի գրկում տեսել է վեցամսական երեխային, որը ողջ է եղել: Նա փաթաթել է երեխային, վերցրել նրան, տեղյակ պահել շտապօգնությանը, որ ոստիկանություն հայտնեն: 

Ցուցմունք են տվել նաև շտապօգնության մեքենայի վարորդը, նաև՝ Ավետիսյանների մյուս փեսան:  Որպես վկա ծանուցվել էին նաև ռազմակայանից Անդրեյ Նուկիշիշը և ևս վեց զինծառայող: Դատական նիստից առաջ, սակայն, դատարանը ռազմաբազայից գրություն է ստացել, որ ինչպես Նուկիշինը, այնպես էլ մյուսներն այլևս ռազմաբազայում չեն և դուրս են հանվել զորամասի անձնակազմի ցուցակից 2015թ. օգոստոսի 15-ին:  Գրությանը կից ներկայացված էին քաղվածքներ հրամաններից: Փաստաթուղթը ստորագրված էր բազայի հրամանատար Ուստինովի կողմից: Ներկայացվել էր միայն վաշտի հրամանատար Ռաչինո վի ցուցմունքը:  

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին  մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրման հմար օգոստոսի 12-ին դատապարտվել է 10 տարվա ազատազրկման: