Որտեղի՞ց դատավորին 200 հազար դոլար

Բարձրաստիճան պաշտոնատար անձանց էթիկայի հանձնաժողովը հրապարակել է հունվարի 8-ին Երեւան քաղաքի Աջափնյակ եւ Դավթաշեն վարչական շրջանների ընդհանուր իրավասության դատարանի դատավոր նշանակված Արմեն Խաչատրյանի՝ պաշտոնը ստանձնելու հայտարարագիրը:

Ըստ հայտարարագրի՝ Խաչատրյանն ունի մեկ բնակարան, մեկ բազմաբանակարան շենքի բնակելի տարածք եւ մեկ հողամաս: Պաշտոնը հանձնելու օրվա դրությամբ նրա կողմից տրված փոխառությունները կազմել են 46 միլիոն դրամ:

Դատավորի դրամական միջոցները նույնպես քիչ չեն: Պաշտոնը ստանձնելու օրվա դրությամբ՝ 47 միլիոն դրամ եւ 100 հազար դոլար: Խաչատրյանի տարեկան եկամուտները 2015թ. հարկային տարում կազմել են 5 միլիոն 600 հազար դրամ:

Հատկանշական է, որ Արմեն Խաչատրյանը քանիցս ենթարկվել է նախազգուշացումների եւ նկատողության: Դեռեւս 2012թ. Արդարադատության խորհուրդը նրան նախազգուշացում էր հայտարարել՝ հաշվի առնելով, որ Խաչատրյանը ամբաստանյալի նկատմամբ նախատեսված պատժի նվազագույն չափից ավելի ցածր պատիժ էր սահմանել՝ թույլ տալով նյութական օրենքի նորմի ակնհայտ եւ կոպիտ խախտում:

Դրանից երկու տարի առաջ՝ 2010թ., Խաչատրյանի նկատմամբ Արդարադատության խորհրդի կողմից կարգապահական վարույթ է հարուցվել, որի արդյունքում նա նկատողություն է ստացել եւ պահվել է նրա աշխատավարձի 25 տոկոսը:

Սակայն դա չի խանգարում դատավորին՝ բարեկեցիկ կյանքով ապրել: Այս իրավիճակը նման է այն անեկդոտին, երբ ուսուցիչը երկուս է նշանակում աշակերտին, իսկ վերջինս պատախանում է. «Նշանակում ես՝ նշանակիր: Զատո մարդավարի ապրում ենք»:

Քրիստինա Տեր-Մաթեւոսյան