«Երաժշտություն հանուն ապագայի» հիմնադրամն իր հնգամյա տարեդարձը տոնեց գալա-համերգով

Դեկտեմբերի 11-ին «Առնո Բաբաջանյան» համերգասրահում դասական երաժշտության տոն էր: Բեմում ելույթ էին ունենում «Երաժշտություն հանուն ապագայի» հիմնադրամի կրթաթոշակառուները: 2019 թ.-ին Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր, UNESCO-ի ազգային դեսպան Սերգեյ Սմբատյանի նախաձեռնությամբ կյանքի կոչված հիմնադրամն այս տարի նշում է իր 5-րդ տարեդարձը: Արդեն ավանդական դարձած բարեգործական համերգը հրաշալի առիթ էր համախմբելու հիմնադրամի կրթաթոշակառուներին, նրանց ուսուցիչներին, հյուրերին և գործընկերներին:

Գալա-համերգը կարծես հիմնադրամի հնգամյա գործունեության ամփոփումը լիներ: Հինգ տարի, որոնց ընթացքում հիմնադրամն անասելի ջանքեր է գործադրել կրթելու պատանի երաժիշտներին՝ հնարավորություն տալով նրանց մասնակցել տարբեր փառատոնների ու վարպետության դասերի, այցելել համերգներ ու թանգարաններ, անգամ օտար լեզվի դասընթացների: Այս ընթացքում անցկացվել է 468 վարպետության դաս արտերկրում և Հայաստանում 145 արտասահմանյան հանրահայտ երաժիշտների հետ, 413 համերգային ելույթ արտերկրում և Հայաստանում, Հայաստանի պետական սիմֆոնիկ նվագախմբի 173 համերգների այցելություններ, այցեր 47 թանգարան, 266 օտար լեզվի դաս: Հիմնադրամի առաքելությունն է Հայաստանի պատանի սերնդի երաժշտական կրթությունն ու զարգացումը:

Օրեր առաջ բեմում ելույթ ունեցող պատանի երաժիշտները վկայությունն են նրա, որ հիմնադրամը հաջողել է իր գործում: Հոգաբարձուների խորհրդի նախագահ Սերգեյ Սմբատյանը, բեմից դիմելով հյուրերին, նշեց՝ ավելի դրական բան, քան դասական երաժշտությունը և տաղանդավոր երեխաներն են, չի կարող լինել մեր կյանքում: Նա շնորհակալություն հայտնեց երեխաների ծնողներին, ուսուցիչներին և բոլոր նրանց, ովքեր այս տարիների ընթացքում մշտապես եղել են հիմնադրամի և տաղանդավոր երեխաների կողքին: Հավելեց՝ հիմնադրամի գործունեության անհավանական հաջողությունը կազմված է երաժշտությանը երեխաների նվիրվածությունից և գաղափարակից մարդկանց գրավիտացիայից, որոնք համախմբվում են այդ տաղանդի շուրջ:

Պատանի երաժիշտները տարիների ընթացքում հանդես են եկել տարբեր երկրների նշանավոր բեմերում, մասնակցել մրցույթների և վերադարձել հաղթանակներով, նրանք անմասն չեն մնում նաև սոցիալական պատասխանատվության միջոցառումներից: Հիմնադրամն իր գոյությամբ և գործունեությամբ ապացուցում է, որ պետք է ճանապարհ հարթել երիտասարդ տաղանդավոր երաժիշտների համար, քանի որ նրանք են մեր հայրենիքի կայուն ու զարգացող ապագայի հիմքը, նրանք են Հայաստանն արտերկրում ներկայացնող մշակութային դեսպանները:

Կայացած դասական երեկոն ևս մեկ անգամ ցույց տվեց հայ պատանի երաժիշտների մեծ ներուժն ու տաղանդը: Հանդիսատեսը վայելեց երեկոն, հպարտացավ պատանիների պրոֆեսիոնալիզմով և, վստահաբար, յուրաքանչյուրն իր հետ տուն տարավ ոչ միայն դրական էմոցիաներ, այլ նաև հավատ երիտասարդ սերնդի և Հայաստանի ապագայի վերաբերյալ:

Հանդիսատեսի շարքերում էր նաև մեծանուն կոմպոզիտոր Տիգրան Մանսուրյանը: Նա իր ներկայությամբ մշտապես ոգեշնչում է երիտասարդ կատարողներին, այս կերպ փոխանցում նրանց դրական լիցքեր և ջերմություն: Մաեստրոն հաջողություններ մաղթեց պատանի երաժիշտներին և փաստեց, որ այն ամենը, ինչ այսօր անում են մեր երեխաները, անգնահատելի հիմք ու թռիչք է: Մաղթեց պատանիներին մեծ հաջողություններ և նորանոր նվաճումներ:

Գալա-համերգից բացի, միջոցառումն ամփոփեց ոչ միայն հիմնադրամի հինգ տարվա գործունեությունը, այլ նաև նախանշեց ապագայի կարևոր նախագծերը: Այս տարիների ընթացքում «Երաժշտություն հանուն ապագայի» հիմնադրամն աջակցել է 60-ից ավելի երիտասարդ երաժիշտների: Վստահաբար, այս թիվն աճելու է: Դեռ շատ ու շատ պատանիներ երաժշտական աշխարհում իրենց ուղին հարթելու են հիմնադրամի օգնությամբ և աջակցությամբ: