«Նորաձևությունը որոշակի ժամանակ հետո կարող է արդիական չլինել». կրթության ոլորտի փորձագետը՝ Աննա Հակոբյանի արշավի մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Մի քիչ դժվար է ասել, որ նորաձևությունը  պետք է կրթություն մտնի, որովհետև նորաձևությունը որոշակի ժամանակի համար է ճիշտ և դրանից հետո կարող է կորցնել իր արդիականությունը»։ Այս մասին այսօր՝ դեկտեմբերի 18-ին, NEWS.am–ի հետ զրույցում ասաց ՀՀ ԳԱԱ գիտակրթական միջազգային կենտրոնի դեկան, կրթության ոլորտի փորձագետ Ատոմ Մխիթարյանը՝ խոսելով Աննա Հակոբյանի՝ «Կրթվելը նորաոճ է» խորագրով արշավի և երեկ ԵՊՀ դասախոսների հետ այդ արշավի շրջանակում տեղի ունեցած հանդիպման մասին։

«Դա երբեք չպետք է վերաբերի կրթությանը։ Կարծում եմ՝ այս առումով, այն թեզը, որ դրված է այդ արտահայտության ներքո, ընդունելի չէ, և ժողովրդի մեծամասնության կողմից ընդունելի չպետք է լինի»,–հավելեց նա։

Խոսելով այն մասին, որ այդ արշավի շրջանակում երեկ Աննա Հակոբյանը հանդիպում էր կազմակերպել ԵՊՀ ռեկտորի, պրոռեկտորների և մի շարք դասախոսների հետ, կրթության ոլորտի փորձագետն ասաց.

«Եթե այդ մասին ասում է մարդ, որը շատ մեծ հաջողություններ չի ունեցել կրթվելով, կամ չի հասել կրթության այն աստիճանին, որպեսզի դառնա ակնածանքի առարկա, դա կարող է վատ ազդել նոր դաստիարակվող սերունդի վրա»։

Ատոմ Մխիթարյանի խոսքով, ԵՊՀ որոշ դասախոսներ սիրով աջակցում են այդ արշավին։

«Գուցե դա իրենց պաշտոնը պահելու կամ բարձրացնելու հնարավորություն է, որովհետև հատկապես պետական համակարգում վերջին նշանակումները որոշ ձևով կապվում են Աննա Հակոբյանի անվան հետ։ Մտածում են՝ գուցե սա շատ լավ առիթ է այդ ցուցակում հայտնվելու և շոուն շարունակելու»,–ասաց նա։

Մանրամասները՝ տեսանյութում։

 Հետևեք մեզ՝ այստեղ