«Այստեղ իմ դերը մեծ է լինելու. մարդիկ սպասելու են կարևոր խորհրդի». Էրիկ Անթառանյանն իր նոր հաղորդման մասին

Blognews.am-ը գրում է.

Այսօր վաճառվող սննդամթերքի որակն ու անվտանգությունն անհանգստացնում են բոլորին: Հայաստանի հանրային հեռուստաընկերությունը մեկնարկում է նոր հաղորդաշար՝ ‹‹Համի որակ›› խորագիրը կրող, որի հիմնական նպատակն է պարզել, բացահայտել մեզ հայտնի սննդամթերքի իրական բաղադրությունը, օգտակարությունը, ինպես նաև պահպանման եղանակները: Այն կվարի Առաջին ալիքի հաղորդավար Էրիկ Անթառանյանը:

Հաղորդման շրջանակներում մթերքն անցնելու է լաբորատոր հետազոտություններ, ստուգվելու է փորձագետների կողմից: Ծրագրի շրջանակներում հեռուստադիտողներին կներկայացվեն նաև մի շարք օգտակար խորհուրդներ տվյալ մթերքի պահպանման և օգտագործման մասին, իսկ փորձագետները կուղղորդեն մարդկանց, թե տվյալ մթերքը գնելիս ինչին է պետք հատկապես ուշադրություն դարձնել: Հաղորդումն իրականացվում է Հայաստանի Հանրապետության գյուղատնտեսության նախարարության սննդամթերքի անվտանգության պետական ծառայության հետ համատեղ:

BlogNews.am-ի հետ զրույցում հաղորդավար Էրիկ Անթառանյանը նշեց. «Սա այն հաղորդումներից չէ, որ նայելու ենք հաճույք ստանալու կամ ժամանցի համար: Սա տեղեկատվական հաղորդում է՝ սպառողներին ուղղորդելու, ճիշտ կողմնորոշվելու հնարավորություն տալու նպատակով է արված։ Այս հաղորդումը, անշուշտ, օգտակար և պետքական կլինի բոլորի համար»:

Հաղորդավարը նշեց, որ այս հաղորդման միջոցով Հանրային հեռուստաընկերությունը որևէ գովազդային նպատակ չի հետապնդում և ուղղորդվում է բացառապես սպառողի շահով. «Բացի այդ, այս հաղորդումը պատրաստվել է ՀՀ ԳՆ Սննդամթերքի անվտանգության ծառայության հետ համատեղ։ Փառք Աստծո, մենք հեռու ենք այդ իրականությունից, իսկ Հայաստանի սննդի համի ու որակի մասին ամբողջ աշխարհին է հայտնի: Մենք պարզապես կօգնենք այդ բազմազանության մեջ ավելի արագ ու ճիշտ կողմնորոշվել: Իսկ եթե, այնուամենայնիվ, այս կամ այն ընկերության արտադրանքի մեջ լինեն թերացումներ, ապա նրանք համապատասխան կարգով կզգուշացվեն, և հուսով ենք՝ այդ ընկերությունները կվերացնեն թերությունները կարճ ժամանակի ընթացքում»: 

Էրիկի համար սա նոր ձևաչափ է, բայց նկարահանումների ընթացքում հասկացել է` կարևոր գործի է լծվել. «Մեր ամբողջ թիմով ջանալու ենք օգնել հայ սպառողին, ու այստեղ իմ դերը մեծ է լինելու, մարդիկ սպասելու են ճիշտ խորհրդի: Զգում եմ պատասխանատվությունն ու ամենայն լրջությամբ մոտենում նախագծին: Իսկ կսիրե՞ն ինձ արդեն որպես այս նախագծի հաղորդավար հեռուստադիտողները՝ ժամանակը ցույց կտա»: 

‹‹Համի որակ›› ծրագիրը եթեր կհեռարձակվի փետրվարի 6-ից՝ յուրաքանչյուր շաբաթ օր, ժամը 12:35-ին: