ԿԳՄՍՆ-ն դասագրքերում QR կոդերը ավելացնել չի մոռացել, բայց դպրոցում տեխնիկական միջոցների մասին մոռացել է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կրթվելը ոչ միայն դարձել է «նորաձև» (պարզվեց), այլև ժամանակակից։ Այժմյան դասագրքերում կարելի է տեսնել նոր հնարքներ՝ QR կոդեր և «խոսող» տեքստեր, այսինքն, հեռախոսը պահելով QR կոդերին աշակերտները հայտնվում են տարբեր կայքերում, սկսած անգամ «Յութուբից»։

Սակայն հասկանալի է, որ այդ նոր հնարքների համար պետք են նաև նոր տեխնոլոգիաներ։ Առաջին հերթին պետք է լինի հեռախոս, որ այդ QR կոդը աշակերտը կարողանա ընթերցել, իսկ դպրոցներում պետք է լինեն հատուկ տեխնիկակական միջոցներ։

MediaHub-ը բազմաթիվ ահազանգեր է ստանում, մասնավորապես, ուսուցիչներից, որ ԿԳՄՍՆ-ն այդ QR կոդերը դասագրքերում ներառել չի մոռացել, սակայն, տեխնիկական միջոցներ դպրոցներին հատկացնելը մոռացել է։

«QR կոդերից օգտվելու համար անհրաժեշտ են տեխնիկական միջոցներ՝ կա՛մ էկրան, կա՛մ համակարգիչ, կա՛մ «պլանշետներ» աշակերտների համար, սակայն, դպրոցներում քիչ դասարաններ կան, որտեղ գոնե կլինի համակարգիչ, էլ չասենք էկրանների կամ ինտերակտիվ գրատախտակների մասին: Ու ի՞նչ ենք անում մենք։ Աշակերտների համար մեր հեռախոսներով ենք բացում այդ QR կոդերը, և ամեն աշակերտին ցույց տալով ժամանակ ենք ծախսում։ Սա ճիշտ չէ, պետք է լինեն տեխնիակական միջոցներ»,– մեզ հետ զրույցում ահազանգում է ուսուցիչներից մեկը։

Բացի այդ, դպրոցներում չկա ինտերնետ անգամ այդ QR կոդերից օգտվելու համար, հավելեց նա, բացի այդ էլ՝ աշակերտներին չի թույլատրվում օգտվել հեռախոսներից։

Ի՞նչ լուծում է նախատեսում բարձրաձայնած այս խնդիրներին ԿԳՄՍՆ-ն, արդյո՞ք Հայաստանի բոլոր դպրոցների բոլոր դասասենյակներում պատրաստվում են էկրաններ, համակարգիչներ կամ ինտերակտիվ գրատախտակներ տեղադրել, կամ, գուցե, եթե դա ծախսատար է, ընդհանրապես հրաժարվել դասագրքերում QR կոդեր ներառելուց. MediaHub-ն այս հարցն այսօր  ուղղեց ԿԳՄՍ նախարար Ժաննա Անդրեասյանին։

«Մենք բոլոր դպրոցներին տրամադրում ենք բնագիտական և տեղեկատվական տեխնոլոգիաների լաբորատորիաներ, պետք է ասեմ, որ բավականին հագեցած լաբորատորիաներ են և, հատկապես, տեղեկատվական տեխնոլոգիաների կտորը, որտեղ տրվում են անհրաժեշտ սարքավորումներ՝ թե՛ համակարգիչների, թե՛ այլ սարքավորումների տեսքով, որպեսզի տեխնոլոգիական միջավայրը դպրոցներում լինի»,– մեր հարցին ի պատասխան նշեց Անդրեասյանը։

Այս պահին, ըստ նախարարի, դպրոցների շուրջ կեսին արդեն նման համակարգչային սարքավորումներ և տեխնոլոգիաներ տրամադրված են։ 

«Այս տարվա հունվարից ավելացրել ենք դպրոցներին տրամադրվող ինտերնետի հզորությունը, որ այս բոլոր էլեկտրոնային նյութերի օգտագործման համար ինտերնետ միջավայրի հասանելիությունը լինի, և այդ պահանջներին զուգընթաց, մենք համապատասխան միջոցների տրամադրում ենք իրականացնում, մնացածը դպրոցի կազմակերպման հարցերն են, դասացուցակի կազմակերպման և այլ տրամաբանության տեսանկյունից դպրոցները պետք է կարողանան ըստ դասարանների ճիշտ պլանավորել իրենց աշխատանքը»,– նշեց Անդրեասյանը։

Ճշտող հարցին, թե ուսուցիչները նշում են, որ ինտերնետ չկա, տեխնիկական միջոցները ոչ բոլոր դպրոցների դասասենյակներում կան, իսկ դասագրքերի մեծ մասում կան QR կոդեր, որոնց օգտագործման համար էլ հենց անհրաժեշտ են սարքավորումներ, ի՞նչ պետք է անի դպրոցը, Անդրեասյանը պատասխանեց․ 

«QR կոդերից օգտվելու համար պարտադիր պայման է էկրանի առկայությունը, որտեղ կցուցադրվի համապատասխան նյութը, որը կարող է լինել համակարգչի էկրանը, «պլանշետի» էկրանը կամ ցանկացած այլ “գաջեթ”։ Ինչ վերաբերվում է ինտերնետին, ապա հունվարից կրկնապատկել ենք դպրոցներում ինտերնետի թողունակությունը և, կարծում եմ, որ ինտերնետի հզորության հետ կապված հարցերը, որոնք նախկինում դպրոցներում ունենում էին, այս տարվանից սկսած էապես կնվազեն: Ունենք տեղեր, հատկապես գյուղական հեռավոր բնակավայրերում, որտեղ կապի խնդիրը միշտ ավելի լուրջ է, բայց այդտեղ էլ այլ տեխնոլոգիական լուծումներ, իսկ քաղաքային բնակավայրերում, որտեղ օպտիկական կապ է, կարծում եմ, որ թողունակության խնդիր չենք ունենա»,– եզրափակեց նախարարը։ 

Այս պատասխանից կարելի է ենթադրել, որ տիկին նախարարը չի շրջել  Երևանի դպրոցների մեծամասնությունում և չի տեսել, որ ոչ բոլոր դասարաններն են հագեցած համակարգչով, էկրանով կամ տեխնիկական միջոցով։ Էլ չենք խոսում այն մասին, որ շատ դպրոցներ ընդհանրապես կահավորված չեն այդ տեխնիկական միջոցներով, բայց, կրկնենք, դասագրքերում չեն մոռացել  QR կոդեր ավելացնելը, և արդեն կես տարի է  թե՛ ուսուցիչների, թե՛ աշակերտների համար նոր գլխացավանք են ավելացրել…

Մարիաննա Արամյան

 Հետևեք մեզ՝ այստեղ