ՀԷՑ-ի լայնածավալ ծրագրերը․ հին ցանցերից դեպի նոր տեխնոլոգիաներ (ֆոտո)

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Հայաստանի էլեկտրական ցանցեր» ընկերությունն իրականացնում է բաշխիչ ցանցի վերազինմանն ու վերակառուցմանն ուղղվածներդրումային ծրագրերը: 2016-2024 թթ. ընկերությունն արդիականացրել և շարունակում է վերազինել էլեկտրաէներգետիկ ենթակառուցվածքները՝ ներդնելով ավելի քան 270 մլրդ դրամ: 2024թ.-ի ընթացքում ներդրումները կազմել են ավելի քան 40 մլրդ դրամ, 2025թ.-ին կկազմեն ավելի քան 47 մլրդ դրամ:

Ծրագրի հիմնական ուղղություններն են՝

- հոսանքազրկումների միջին տևողության և հաճախականության ցուցանիշների պահպանմանը և մաշված սարքավորումների փոխարինմանն ուղղված ներդրումներ,

- թույլատրելի սահմաններից էլեկտրաէներգիայի լարման շեղման միջին տևողության և հաճախության կրճատմանն ուղղված ներդրումներ,

- նոր սպառողների միացմանը և բաշխիչ ցանցի զարգացման նպատակային ծրագրերի իրականացմանն ուղղված ներդրումներ,

- էլեկտրաէներգիայի ավտոմատավցած հաշվառման ու վերահսկման համակարգի ներդրումներ և այլ ուղղություններ

Կոտայքի մարզի Ջրվեժ գյուղում վերջերս մեծ փոփոխություններ են տեղի ունեցել։ Տարիներ շարունակ խնդիրներ ստեղծող հին, սարդոստայն հիշեցնող և հաճախ վտանգավոր հաղորդալարերը, ինչպես նաև հենասյուները փոխարինվում են նոր, ժամանակակից համակարգերով՝ ինչը զգալիորեն բարձրացրել է անվտանգության մակարդակը։

Ջրվեժի բնակիչ Արայիկ Մարգարյանը, խոսելով կատարված փոփոխությունների մասին, նշում է. «Մինչև հիմա հին՝ սովետի ժամանակ անցկացված լարեր էին, մի փոքր քամի էր լինում՝ միանգամից հոսանքն անջատվում էր։ Լարերը փոխելուց հետո շատ լավ ա։ Աստծուն փառք, գոհ ենք»։

Հանգիստ շունչ է քաշում նաև Ջրվեժ համայնքի ղեկավարի օգնական Անահիտ Մարգարյանը։ «Շատ հաճախ էին վթարներ լինում։ Եղել են դեպքեր, երբ բնակչության շրջանում դժգոհություններ էին առաջանում, քանի որ սառնարաններն ու հեռուստացույցներն էին փչանում։ Այդ ժամանակ մարդիկ անմիջապես գալիս էին համայնքապետարան բողոքելու», - նշում է համայնքի ղեկավարի օգնականը։Ջրվեժում ծնված ու ու մոտ վեց տասնամյակ այս համայնքում ապրող Անահիտ Մարգարյանն ասում է, որ վերջին 50 տարիների ընթացքում այսպիսի լայնածավալ ներդրում համայնքում չի եղել։ Միայն մասնակի նորոգումներ են կատարվել, ինչը ժամանակավոր լուծում էր։«Վերջապես աշխատանքները կավարտվեն, և մենք կունենանք կայուն հոսանք։ Ամեն մի քամուց, անձրևից կամ ձյունից վթարներ չեն լինի», - ասում է մեր զրուցակիցը։

Աբովյան էլեկտրացանցի գլխավոր ճարտարագետ Ստեփան Խանզադյանը, ներկայացնելով ընթացիկ աշխատանքները, ասում է.«Ջրվեժ համայնքում 0.4 կիլովոլտ ցանցն ամբողջությամբ փոխարինել ենք նորով։ Այժմ կատարում ենք բնակիչների ներմիացումը նոր ցանցին։ Անվտանգության նկատառումներով փոխարինվում են նաև 10 կիլովոլտ ցանցի օդային գծերը»։

ՀԷՑ-ը մեծածավալ աշխատանքներ է իրականացվում նաև Արմավիրի, Արարատի և այլ մարզերում։ Արմավիրի էլեկտրացանցի գլխավոր ճարտարագետ Վազգեն Թադևոսյանի խոսքով՝ այժմ հիմնանորգում են Վարդանաշեն և Երասխահուն գյուղերը սնուցող գիծը։ Փոխարինում են այրված, քայքայված, ոչ ստանդարտ հենասյուներն ու հաղորդալարերը՝ ինչը նպաստում է հուսալիության բարձրացմանը և անջատումների նվազեցմանը։ Այս հատվածում կապիտալ ներդրումներ կատարվել են մոտ 15 տարի առաջ։

Մինչև այս լայնածավալ աշխատանքներ են կատարվել Արմավիրի մարզի Նորապատ համայնքում։ Կհիմնանորոգվեն նաև Արմավիր քաղաքի մի հատվածի էլեկտրալարերն ու հենասյուները։ Ընթացքում է Եղեգնուտ գյուղի 10 կիլովոլտ օդային գծի վերանորոգումը։ Դրանից հետո պլանավորված է հիմնանորգել Մարգարա, Զարթոնք և մի քանի այլ գյուղերի ցանցը։ Վազգեն Թադևոսյանը նշում է՝ աշխատանքները շարունակական են ու անընդհատ։

Աշխատանքն ակտիվ փուլում է նաև Արարատի մարզում։ Այստեղ նոր գծեր են անցկացվում Վեդի քաղաքի համար։ Ընթացքում խոչընդոտներ էին առաջացնում սեփականաշնորհված հողատարածքներով անցնող օդային գծերը։ Նախկինում շատ վայրերում վնասված հատվածին մոտենալն անհնար էր, իսկ մաշված համակարգում հաճախակի էին խնդիրներ լինում։

«Վեդի քաղաքը սպասարկելու համար հիմա նոր ճանապարհով նոր գիծ ենք անցկացնում։ Այլևս նման խնդիրներ չեն լինի՝ անխափան մատակարարումը կապահովվի։ Բացի այդ, մենք նաև նախաձեռնել ենք Վանաշեն ենթակայանից Այգեվան 10 կմ ուղղության հիմնանորոգումը, որը սնում է Այգեվան գյուղն ու Ավշար գյուղը։ Վերակառուցելու շատ այլ գծեր էլ կան։ Մի ուղղությունը վերջացնելուց անմիջապես հետո անցնում է մյուս ուղղությունների հիմնանորգմանը»,– նշում է Արարատ էլեկտրացանցի գլխավոր ինժեները։ Այս մարզում հսկայածավալ աշխատանք է կատարվել նաև 2023 և 24 թվականներին՝ 18 կմ գիծ է կառուցվել Երասխում և Սևակավան գյուղում։

ՀէՑ–ը մեծ ներդրումներ կանի նաև առաջիկա տարիներին։ Հանրային ծառայությունները կարգավորող հանձնաժողովը հաստատել է ընկերության 2024–ից 2034 թվականների ներդրումային ծրագիրը, որի արժեքն ավելի քան 305 մլրդ դրամ է: Այս գումարն ուղղվելու է ցանցերի վերազինմանն ու արդիականացմանը, ցանցին նոր սպառողների միացմանը, առևտրային հաշվառման համակարգի և սմարթ հաշվիչների ներդրմանը:

Ներդրումներն իրենց հետ բերում են ոչ միայն էլեկտրամատակարարման հուսալիություն, այլև նպաստում են բնակիչների կյանքի որակի բարձրացմանը։

 Հետևեք մեզ՝ այստեղ