Գյումրեցի ջութակահարն անցել է Մոսկվայի Պետական Կոնսերվատորիայի միջազգային մրցույթի եզրափակիչ փուլ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գյումրեցի երիտասարդ ջութակահար Ռուբեն Մատինյանը, հաղթահարելով Մոսկվայի Չայկովսկու անվան Պետական Կոնսերվատորիայի հայտարարած երիտասարդ երաժիշտ-կատարողների III միջազգային «Ստեղծագործության տարածք» մրցույթի փուլերն, անցել  է եզրափակիչ փուլ: Ինչպես տեղեկացնում է «Արմենպրես»-ը, 17-ամյա ջութակահարը մասնակցել է մրցույթին՝ լարային գործիքներ անվանակարգում՝ դասատու Անահիտ Մկրտչյան, նվագակցող Ազատուհի Վանոյան։ Մրցույթի մասնակիցները հնարավորություն ունեին ներկայանալու ինչպես տեղում, այնպես էլ հեռավար։ 2024 թվականի նոյեմբերի 1-ին մեկնարկած մրցույթը կավարտվի 2025 թվականի փետրվարի 12-ին:

«Օգտվելով այն հանգամանքից, որ հնարավորություն կար ներկայանալու հեռավար, ձայնագրել եմ կատարումը սովորական բջջային հեռախոսով և ուղարկել։ Մրցույթը բավական թեժ էր,  փուլերը հաղթահարելն ինձ համար անակնկալ էր»,-անկեղծանում է Ռուբենը՝ տեղեկացնելով, որ մասնակցելու համար գրանցված է եղել 400 մասնակից։

Ռուբենը լարային բոլոր գործիքների անվանակարգում միակ հայ մասնակիցն է։

Մոսկվայում երեք մասնակցից կընտրվի լավագույն երաժիշտ-կատարողը, ով էլ կմասնակցի գալա համերգին:

Մոսկվայի լսումների համար երիտասարդը, բացի պարտադիր ստեղծագործություններից, ներկայացնելու է Կոմիտասի ստեղծագործությունը:

«Այս ընթացքում հիմնական խնդիրը ոչ միայն ֆինանսականն է՝ բոլոր ծախսերը հոգում է մասնակիցը, այլ նաև տեխնիկական՝ գործիքի տեղափոխությունը»,-ասում է Ռուբենը:

Երիտասարդ երաժիշտը սովորում է Գյումրիի Կարա Մուրզայի անվան երաժշտական քոլեջում: Իր ողջ հաջողությունների առյուծի բաժինը համարում է իր ուսուցչուհունը՝ Անահիտ Մկրտչյանինը:

Տարիների ընթացքում երիտասարդ ջութակահարը մասնակցել է ինչպես հանրապետական, այնպես էլ միջազգային շատ մրցույթների և ստացել բազմաթիվ մրցանակներ, ունեցել է անհատական համերգ հայրենի քաղաքում:

Իր ապագա ծրագրերի մասին խոսելիս Ռուբենը առանձնացնում է Նյու-Յորքի Ջուլիարդի անվան արվեստի և երաժշտության դպրոցում սովորելու ցանկությունը, որին ուսանելու հայտն արդեն ներկայացրել է:

 Հետևեք մեզ՝ այստեղ