Մի օր կհաշվենք այն հսկայական ռեսուրսները, որոնք այս իշխանությունը վատնում է ուրվականների բռնոցիների և մասկիշոուների վրա․ Տիգրան Աբրահամյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մի օր կհաշվենք այն հսկայական ռեսուրսները, որոնք այս իշխանությունը վատնում է ուրվականների բռնոցիների և մասկիշոուների վրա։ Այս մասին իր ֆեյսբուքյան էջում գրել է ԱԺ «Պատիվ ունեմ» խմբակցության քարտուղար Տիգրան Աբրահամյանը․

«Հուսով եմ, որ մի օր կհաշվենք ու կգնահատենք այն հսկայական ռեսուրսների ծավալը, որն այս իշխանությունը վատնում է ուժային կառույցների միջոցով` ուրվականների բռնոցիներից, մասկիշոուներից մինչև «դատական ատյաններում» իրականացվող ֆարսից:

Քաղաքական հակառակորդների խոսքն ու շարժը սահմանափակելու, լռեցնելու, հանրության մոտ կեղծ պատկեր ձևավորելու շրջանակներում իրականացվողն ու դրա վրա ծախսվող գումարներն ու ժամավաճառությունն աննախադեպ հարված են պետությանը:

Խոսքը չի վերաբերվում այն անձանց, որոնց գործերը, այդ թվում` այս իշխանության պաշտոնյաների նկատմամբ, զուտ իրավական հարթությունում է: Դա պետք է հստակ տարանջատել:

Այն գումարները, որոնք դրվում է բռնապետական բնույթի քաղաքական օպերացիաների վրա` ոստիկանական, քննչական, դատախազական օպերացիաներից մինչև դատական համակարգ, ոչ այլ ինչ են, քան նեղ իշխանական խմբի քաղաքական ամբիցիաների և ֆանտազիաների բավարարում:

Նայում ես այս տարիներին ընթացող «իրավական», իսկ իրականում քաղաքական բեմադրությունները` նախկին նախագահներից, քաղաքական, ռազմական, քաղաքացիական ակտիվ դերակատարներից մինչև զոհված հերոսների ծնողներ ու հասկանում, որ ահռելի գումարներ, որոնք պետք է դրվեին արտաքին սպառնալիքների չեզոքացման վրա, ուղղակի փոշիացվում են:

ՀԳ. Իսկ Արմեն Աշոտյանի գործն առհասարակ Սանտա Բարբարայի սերիալին է նմանվել, որտեղ միակ հետաքրքրականը Արմենի սուր դատողություններն ու ինտելեկտուալ հումորն է: Իսկ Աշոտյանը 15-ամսյա բանտային կալանքից հետո, արդեն 4-5 ամիս է` տնային կալանքի ռեժիմում է` քաղաքական մեծ սահմանափակումներով»։

 Հետևեք մեզ՝ այստեղ