«Բոլոր այն վատ արարքները, որոնք դու կյանքում գործում ես, բումերանգի օրենքով հետ են վերադառնում». Սամվել Դանիելյանը՝ «Կարմա. Ժամը կգա» հոգեբանական դրամայի մասին
ԼԱՅՖՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
«Շունչ» թատրոնի նոր հոգեբանական դրաման կստիպի հանդիսատեսին մտածել իր քայլերի, ընտրությունների և դրանց հետևանքների մասին։
«Կարմա»-ն պատմություն է երեք տղամարդկանց մասին, որոնք հայտնվում են մութ իրականության կիզակետում, որտեղ ճշմարտությունն ու խաբեությունը խառնվում են իրար։
Կյանքում ամեն ինչ վերադառնում է, և ամեն ինչ ունի իր վերադարձի ճիշտ ժամը։ Դա է Կարմայի անխուսափելի օրենքը:
«Հավատարիմ մնալով մեր սկզբունքներին որոշեցինք, որ գրվի նոր պիես հատուկ Շունչ թատրոնի համար:
Այս անգամ համագործակցում ենք Էդգար Կոստանդյանի հետ, ով մեզ համար գրում է «Կարմա. Ժամը կգա» ներկայացումը»,- Tert.am Life-ի հետ զրույցումն պատմեց թատրոնի տնօրեն Սամվել Դանիելյանն, ով ներկայացման մեջ մարմնավորելու է գլխավոր հերոսներից մեկին:
«Շունչ թատրոնն անդրադառնում է այն թեմաներին, որոնք կհետաքրքրեն հասարակությանն անկախ տարիքից և սեռից»,- նշեց դերասանն, ում կարծիքով այս ներկայացումը շատ կարևոր ասելիք ունի:
«Բոլոր այն վատ արարքները, որոնք դու կյանքում գործում ես, բումերանգի օրենքով հետ է վերադառնում քեզ: Եվ, եթե գիտակցում ես քո վատ արարքները, պետք է ապաշխարհես, մաքրվես, արդար ու ազնիվ կանգնես դատաստանի առաջ:
Էդգար Կոստանդյանի շատ մանրամասն ենք աշխատում, միասին վերընթերցում ենք, փոփոխություններ ենք անում»,- նշեց մեր զրուցակիցը:
Ներկայացման 3 դերակատարներն էլ տղամարդիկ են, որոնց մարմնավորում են Սամվել Դանիելյանը, Սեյրան Մովսիսյանն ու Սաշա Սուքիասյանը: Բեմադրությունը Շուշան Ղազարյանինն է, երգերի հեղինակը Արվին Քոչարյանն է, գործիքավորումն իրականացրել է Վահե Գրիգորյանը:
Ներկայացումն իր տեսակով՝ ըստ Սամվել Դանիելյանի նորություն է լինելու հանդիսատեսի համար:
«Ներկայացման ժամանակ օգտագործվելու են տարբեր հնարքներ, չեմ ուզում բացել չակերտները: Ինչ վերաբերում է կերպարներին՝ 3 տարբեր կերպարներ են, որոնք նույն խնդրի հետ առնչվելով հավաքվել են նույն տեղում: Նրանցից յուրաքանչյուրը խոստովանելով իր մեղքը՝ հանդիսատեսին փոխանցում է այն ուղերձը, որ ոչ մի մեղք հենց այնպես չի անցնում: Եթե անգամ ոչ ոք չնկատի, միևնույն է Աստված նկատում է: Շատ ավելի խելամիտ է վատ արարքը գործելուց հետո կարողանալ ընդունել սխալն ու արդար կանգնել խոստավանության:
Թեման շատ խոցելի է, ու վստահ եմ, որ պրեմիերայից հետո ներկայացումը շատ մեծ տարածում է ունենալու»,- ամփոփեց Սամվել Դանիելյանը:
Ներկայացման պրեմիերան նախատեսված է փետրվարի 27-ին՝ Ստանիսլավսկու անվան ռուսական թատրոնում:
