Այս ամենը ծիծաղելի կլիներ, եթե այդքան տխուր չլիներ. «Փաստ»

«Փաստ» օրաթերթը գրում է.

instituteinnovation.ru–ն «Ռոդիոնով. Հայաստանի իշխանությունների որոշումը՝ սկսելու ԵՄ-ին ինտեգրումը, բացահայտ պոպուլիզմ է» վերնագրով հոդվածում գրում է, որ Նիկոլ Փաշինյանը հայտարարել է, թե Հայաստանն ու Եվրամիությունը սկսել են բանակցությունները Եվրամիության հետ վիզային ռեժիմի ազատականացման շուրջ։ Բացի այդ, ՀՀ կառավարությունը հավանություն է տվել ԵՄ-ին ինտեգրման գործընթաց սկսելու նախաձեռնությանը։ institute-innovation.ru լրատվական գործակալության թղթակիցը կապվել է Ինովացիոն զարգացման ինստիտուտի աշխարհաքաղաքական հետազոտությունների կենտրոնի տնօրեն Դմիտրի Ռոդիոնովի հետ և խնդրել նրան մեկնաբանել Հայաստանի իշխանությունների որոշումը։

Փորձագետը պատասխանել է մի շարք հարցերի, այդ թվում՝ արդյո՞ք այդ որոշումը պոպուլիզմ է, թե՞ իրական ինտեգրացիոն քայլ, ի՞նչ կարող են ակնկալել Հայաստանի քաղաքացիները, և ինչպե՞ս կանդրադառնա այդ որոշումը Ռուսաստանի և Հայաստանի երկկողմ հարաբերությունների վրա։

Դմիտրի Ռոդիոնով.– Իհարկե, սա բացահայտ, անթաքույց պոպուլիզմ է։ Որո՞նք են իրական ինտեգրման քայլերը: Եվրամիությունը տեղյա՞կ է, որ Հայաստանը սկսել է դրան միանալու գործընթացը։ Ինչ-որ մեկը Հայաստանին հրավիրե՞լ է այնտեղ։ Այս ամենը ծիծաղելի կլիներ, եթե այդքան տխուր չլիներ։ Ամենացավալին այն է, որ դա աշխատում է, և հայ հասարակության մեջ կգտնվեն այնպիսիք, որոնք, անգամ իրենց աչքի առաջ ունենալով թեկուզ Վրաստանի, առավել ևս՝ Ուկրաինայի օրինակը, կգնան դրան։ Բայց նշվածներին Եվրոպայում գոնե ինչոր բան էին խոստանում։ Իսկ ի՞նչ կարելի է ասել Հայաստանի մասին։ Եթե այն ժամանակ եվրաինտեգրման մասին հեքիաթները դեռ համեմատաբար հավանական էին թվում, ապա այժմ դա պարզապես ծաղր է: Բայց, կրկնում եմ, ամենասարսափելին այն է, որ այսօր էլ դրան հավատացողներ կլինեն։

Իհարկե, սա ոչ միայն պոպուլիզմ է, այլ նաև փորձ՝ ցույց տալու Բրյուսելին Ռուսաստանից հեռու մնալու ամբողջական հավատարմությունը և պատրաստակամությունը։ Իհարկե, Փաշինյանն ու իր թիմը պատրանքներ չունեն ԵՄ-ի հետ կապված, բայց նրանց համար կարևոր է ևս մեկ անգամ ցույց տալ երկրի արտաքին քաղաքական վեկտորի փոփոխությունը։ Դա կվատթարացնի՞ Ռուսաստանի հետ հարաբերությունները։ Կոնկրետ ոչ, մանավանդ որ բարելավման տեղ էլ չկա։ Բայց խնդիրն այն է, որ սա մի ամբողջ շղթա է, քայլերի մի ամբողջություն, որոնք միասին Հայաստանը տանելու են դեպի անդունդ, եթե նույնիսկ պատերազմ չլինի, թեև Ալիևի վերջին հայտարարությունները ցույց են տալիս, որ կլինի, քանի որ Ադրբեջանի նախագահը պրագմատիկ է, նա առիթը բաց չի թողնի ոչնչացնելու պատմական թշնամուն: Հայաստանի խզումը Ռուսաստանի հետ և ԵԱՏՄ-ից դուրս գալը կհանգեցնի երկրի լիակատար փլուզման: Ի վերջո, նրա տնտեսության մեկ երրորդից ավելին աշխատում է ԵԱՏՄ-ի հետ, երկիրը խիստ կախված է ածխաջրածինների, փայտանյութի, շինանյութերի ռուսական մատակարարումներից, ռուսական շուկայից, էժան վարկերից և ներդրումներից։ ԵՄ-ն չի փոխհատուցի այդ ամենի համար: Սակայն, եթե հավատանք այն վարկածին, որ Փաշինյանը գործը տանում է դեպի պատերազմ և Հայաստանի կործանում, ապա տնտեսական ճգնաժամի տանող քայլերից դժգոհելը ինչ որ տեղ հիմարություն է...

Մանրամասները՝ «Փաստ» օրաթերթի այսօրվա համարում