ԵԽԽՎ-ում ՀՀ պատվիրակությունը ձգտում է գործել «Արցախին վերաբերող ցանկացած հարց` Արցախի մասնակցությամբ» սկզբունքով

Եվրախորհրդի Խորհրդարանական վեհաժողովում Հայաստանի Հանրապետության պատվիրակությունը ձգտում է գործել «Արցախին վերաբերող ցանկացած խնդիր կարող է քննարկվել ու լուծվել միայն Արցախի մասնակցությամբ» սկզբունքով: Բացի այդ` աշխատանք է տարվում ԵԽԽՎ ձևաչափերի շրջանակում ստեղծել համագործակցություն Արցախի ազգընտիր պատգամավորների հետ:«Արմենպրես»-ի փոխանցմամբ` այս մասին լրագրողների հետ զրույցում հայտարարեց ԱԺ փոխնախագահ, ԵԽԽՎ հայաստանյան պատվիրակության ղեկավար Հերմինե Նաղդալյանը: «Մենք այս առնչությամբ որևէ նահանջ թույլ չենք տվել: Մեր քաղաքական գիծը ԵԽԽՎ-ում եղել է ու մնում է` Արցախին վերաբերող բոլոր հարցերը միայն Արցախի մասնակցությամբ քննարկելու գիծը: Մենք մեր ելույթներում, բոլոր հնարավոր հարթակներում խոսում ենք ԼՂՀ խորհրարանականների հետ համագործակցություն սկսելու և ԵԽԽՎ հատուկ ձևաչափերը օգտագործելու մասին»,-ասաց Հերմինե Նաղդալյանը` օրինակ բերելով  Կոսովոյի, Պաղեստինի և այլ երկրների հետ ԵԽԽՎ համագործակցությունը:

Անդրադառնալով երկու հակահայկական զեկույցներին ու պատվիրակության կատարած աշխատանքին` Հերմինե Նաղդալյանը նկատեց, որ հատկապես Ուոլտերի զեկույցը ձգտում էր ունենալ քաղաքական մեծ ու վտանգավոր դերակատարություն:

Ինչպես նշեց պատգամավորը, Մինսկի խմբի ձևաչափում անցկացվող բանակցություններում ձախողումներն ու ադրբեջանամետ սկզբունքներ ու ձևակերպումներ ընդունելու հույսի կորուստն Ադրբեջանին մղեց նմանատիպ զեկույցի պատրաստման: «Այս պայմաններում նրանք փորձում են նախաձեռնել որևէ քայլ, որը կարող է իրավիճակի փոփոխություն բերել: Իհարկե, առաջին հարթակը ԵԽԽՎ-ն էր, որտեղ իրենք ունեն բնական ստարտային առավելություններ` ավելի մեծ թվով պատվիրակներ, համախոհների մեծ բանակ: Այստեղ քվեարկություններն ու որոշումները կայացվում են մեծամասնությամբ և ոչ այնպես, ինչպես մյուս միջագզային այլ հարթակներում, երբ գործում է կոնսենսուսի ձևաչափը: ԵԽԽՎ-ն պարզ մեծամասնությամբ է խնդիրների լուծումը կայացնում, այդ իմաստով` այն առաջին ու նպաստաավոր հարթակն էր նրանց համար»,-հավելեց Հերմինե Նաղդալյանը:

Բացի այդ` պատգամավորը նկատեց, որ նման զեկույց կարող էր ծնվել ադրբեջանցիների և նրանց սատարողների կողմից «հետղրիմյան» շրջանում, երբ ռուսական պատվիրակության նկատմամբ որոշակի քայլեր նախաձեռնվեցին: «Սարսանգի զեկույցը ծնվել է «նախաղրիմյան» ժամանակահատվածում, երբ ադրբեջանցիները ջրի խնդիր բարձրացնելու հարց կարող էին լուծել: «Հետղրիմյան» ժամանակահատվածում, երբ արդեն ռուսաստանյան պատվիրակության նկատմամբ եղավ Եվրոպայի բուռն արձագանքը, ընդհուպ մինչև լիազորություններից զրկելը, օգտվելով պահից` նրանք նախաձեռնեցին Ուոլտե րի զեկույցը, որը խնդիր ուներ ծրագրային լուծում տալ Մինսկի ձևաչափին զուգահեռ կամ դրան մերժող, ադրբեջանական բոլոր հարցադրումներին տուրք տվող հակահայկական ծրագրի, որով փորձ կարվեր ընդհանրապես լուծման նախագիծ ներկայացնել Ղարաբաղյան խնդրին»,-հավելեց պատգամավորը:

Եվրախորհրդի խորհրդարանական վեհաժողովը մերժել է բրիտանացի խորհրդարանական Ռոբերտ Ուոլթերի (ի դեպ, նա արդեն ԵԽԽՎ անդամ չէ- հեղ.) «Բռնության աճըԼեռնային Ղարաբաղում և Ադրբեջանի մյուս օկուպացված տարածքներում» զեկույցը: Զեկույցին կողմ քեվարկեց 66, դեմ 70 պատգամավոր:

Միևնույն ժամանակ, ԵԽԽՎ-ն ընդունել է Բոսնիայի ու Հերցեգովինայի ներկայացուցիչ Միլիցա Մարկովիչի «Ադրբեջանի սահմանամերձ բնակավայրերի բնակիչներըկանխամտածված կերպով զրկվում են ջրից» թեմայով զեկույցը, որն ընդունվել է որոշակի լրամշակումներով: Զեկույցին կողմ է քվեարկել 98, դեմ՝ 71 պատգամավոր: