Իշխանությունները ՍԴ նոր դատավոր են փնտրում
ՎԵՐԼՈՒԾԱԿԱՆ
Սահմանադրական դատարանի դատավոր Վահե Գրիգորյանին Մարդու իրավունքների եվրոպական դատարանի դատավոր նշանակելուց հետո ՍԴ-ում դատավորի մեկ տեղ թափուր է մնացել։ Առաջիկայում իշխանությունը կրկին պետք է թեկնածու որոնի այդ տեղի համար։
Ընդ որում, թեպետ գործող իշխանությունները կադրային լուրջ սով են զգում, թեկնածուների պակաս, կարծես թե չկա։ ՔՊ մեր աղբյուրի փոխանցմամբ, Ազգային ժողովի «Քաղպայմանագիր» խմբակցության առնվազն երկու պատգամավորներ են հավակնում այդ պաշտոնին։ Խոսքը Պետաիրավական հարցերի հանձնաժողովի նախագահ Վլադիմիր Վարդանյանի և նույն հանձնաժողովի փոխնախագահ Արուսյակ Ջուլհակյանի մասին է։ Իշխող ուժը հակված է նրանցից մեկին դատավորի պաշտոնում նշանակել, սակայն Նիկոլ Փաշինյանը դեմ է։ Առանց այն էլ ՔՊ-ն նորմալ իրավաբան խորհրդարանում գրեթե չունի, իսկ Պետաիրավական հարցերի հանձնաժողովը բավական լուրջ գործ է անում՝ այն աչքաթող անելու համար։ Չի բացառվում, որ ի վերջո, Ջուլհակյանի թեկնածության վրա կանգ առնեն։
Մյուս կողմից էլ դատավորի պաշտոնի նկատմամբ հավակնություններ ունի փաստաբան Տիգրան Եգորյանը։ Վերջինիս համար լոբբինգ անողը հենց նույն Վահե Գրիգորյանն է, ով Նիկոլ Փաշինյանին է միջնորդել։ Ընդ որում, Եգորյանը բավական լուրջ ներգրավվածություն է ունեցել «Եվրաքվե»-ի կազմակերպման և իրականացման հարցում, անմռունչ կատարում է փաշինյանական իշխանության բոլոր հրահանգները։
ՍԴ նոր դատավորի թեկնածությունը քննարկելու են ՔՊ վարչության առաջիկա նիստերից մեկում, իսկ որոշում կայացնելուց հետո կներկայացնեն խորհրդարանի հաստատմանը։
Էլլա Ալիխանյան
