«Ոչ մի թատրոն որևէ մեկի սեփականությունը չէ». Սուրեն Շահվերդյանը՝ Ստանիսլավսկու թատրոնի տնօրենի պաշտոնը զբաղեցնելու, հնացած ոճի ու նոր անելիքների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ինչ փոխվեց ռեժիսոր Սուրեն Շահվերդյանի կյանքում, երբ դարձավ Ստանիսլավսկու անվան ռուսական դրամատիկական թատրոնի տնօրեն: Արդյոք նոր պաշտոնը չի խանգարում ստեղծագործելուն և ի՞նչ բարեփոխումներ է նախատեսում՝ թատրոնում նոր շունչ բերելու համար:

Այս ամենի մասին Tert.am Life-ը զրուցել է Սուրեն Շահվերդյանի հետ, ով արդեն 1 տարի է զբաղեցնում է  թատրոնի տնօրենի պաշտոնը:

Աթոռները հին էին և պոկված...

«Ամենաուրախալին ինձ համար այս ամիսների ընթացքում այն է, որ  մեր թատրոնի հանդիսատեսի համար նախատեսված աթոռները, որոնք արդեն մոտավորապես 70 տարվա պատմություն ունեն, այս տարի ամռանը կփոխարինենք նորով:

 Մշակույթի նախարարությունը հաստատել է և գումար է հատկացնելու, որպեսզի մենք դա իրականացնենք։ Ինձ համար շատ կարևոր է, որ հանդիսատեսը թատրոնում լինի հարմարավետ միջավայրում»,- մեզ հետ զրույցում պատմեց ռեժիսորը:

Նրա խոսքով՝ այսօր,  հատկապես երիտասարդներին, հնարավոր չէ ընդունել մի շենքում, որտեղ աթոռները հին են:

«Շատ հաճախ այդ աթոռները չեն դիմանում և պոկվում են։ Դա կարևորագույն խնդիր էր ինձ համար և կարծում եմ, որ մեր նոր թատերաշրջանը բացելուն պես մենք կդիմավորենք մեր հանդիսատեսին նոր դահլիճում: Նախասրահը ևս նախատեսված է վերանորոգել»,- նշեց Սուրեն Շահվերդյանը:

Նա հիշում է, երբ դեռ փոքր տարքիում քայլում էր քաղաքի այս հատվածով, թատրոնի դիմաց գովազդային վահանակներ էին փակցված, որոնք շատ հին էին և ժամանակի հետ համահունչ չէին:  

«Այդ վահանակը փոխարինել ենք ժամանակակից վահանակով:  

Մոտ ապագայում պլանավորում ենք նաև լեդ էկրաններ տեղադրել, որտեղ կգովազդվեն մեր թատրոնի ներկայացումները:

Ես կարծում եմ՝ իմ արտասահմանյան թատրոններում աշխատելու փորձը օգտակարություն էր, որն այսօր կիրառում եմ մեր թատրոնի բարելավման համար:

Ցավոք, մենք տարիներ շարունակ Խորհրդային Միության ժամանակվա տրամաբանությամբ ենք շարունակում աշխատել:

 Ես տեսել եմ, թե ինչպես է առաջ գնում և ինչպես է կառավարվում Եվրոպական թատրոնը, և դա փորձում եմ կիրառել մեր թատրոնում»,- նշեց մեր զրուցակիցը:

Երբ ստեղծագործողը հասկանում է, որ այլևս ասելիք չունի, պետք է զիջի...

Սուրեն Շահվերդյանը վստահեցրեց, որ իրեն որպես ստեղծագործող այս ամենը չի խանգարում, քանի որ սա ևս ստեղծագործական ու ռեժիսորական աշխատանք է:

«Իհարկե դժվարություններ կան ժամանակի հետ կապված, բայց ես կարծում եմ, որ թատրոնը պետք է ունենա մեկ ղեկավար:

Շատ դեպքերում վարչական և ստեղծագործական աշխատանքը միմյանց լրացնում են, որովհետև վարչական աշխատողը շատ հաճախ չգիտի, թե ստեղծագործական կազմին ինչ է հարկավոր»,- մեզ հետ զրույցում նշեց ռեժիսորը: Նրա համոզմամբ՝ այսկերպ որոշ հարցեր շատ ավելի արագ և նպատակային են լուծվում:

Սուրեն Շահվերդյանը չի ժխտում՝ այսօր շատ թատրոններ աշխատում են հին ոճով և չեն ուզում ընդունել սերնդափոխությունը:

«Շատերի մոտ կարծրատիպ կա, որ սա մեր թատրոնն է, մեր տունն է, մենք արդեն 20 կամ 30 տարի այստեղ ստեղծագործել ենք, և մեզնից բացի ոչ ոքի չենք տեսնում: Դա լուրջ ու ցավոտ խնդիր է, ինչ-որ առումով հասկանալի, բայց ինչ-որ առումով էլ՝ ոչ:

Երբ ստեղծագործող մարդը հասկանում է, որ այլևս ասելիք չունի և կրկնում է իրեն, ինչ-որ պահի պետք է զիջի:

Ուզում եմ հիշեցնել, որ ոչ մի թատրոն որևէ մեկի սեփականությունը չէ: Պետական թատրոնը պետության թատրոնն է և բոլորինն է։

Եվրոպական թատրոնում երբևէ չեմ լսել, որ այս կամ այն դերասանը կամ ռեժիսորն ասի՝ Բուխարեստի ազգային թատրոնը մեր տունն է, և մենք այստեղ հավերժ ենք:

Հակառակը, շատ առողջ է մթնոլորտը»- պատմեց ռեժիսորը:

Նրա խոսքով՝ Ստանիսլավսկու թատրոնը ղեկավարելու ընթացքում մեկ ներկայացում է բեմադրել, մյուս ներկայացումների հեղինակները այլ ռեժիսորներ են:

«Պետք է առողջ սերնդափոխություն լինի, պետք է թատրոն անընդհատ նոր մարդիկ գան, նոր շունչ բերեն և փոխեն միջավայրը»,- համոզված է Շահվերդյանը:

Որևէ մեկը կարո՞ղ է փակել Նարինե Մալյանի  թատրոնը...

Անդրադառնալով «Գոյ» թատրոնի լուծարմանն ու վերջին շրջանում թատրոններ փակելու միտմանը՝ ռեժիսորն արձագանքեց.

«Որևէ տեղ, երբ ստեղծագործական բուռն պրոցես է տեղի ունենում և հասարակությունը հետաքրքրված է, հաճախում և սիրում է, այդպիսի ստեղծագործական օջախը հնարավոր չէ փակել։

Որևէ մեկը երբևէ կարո՞ղ է Նարինե Մալյանի  թատրոնը փակել:

Ես համարում եմ, որ այնտեղ, որտեղ պրոցես կա և հետաքրքիր բան է կատարվում, չեն կարող փակել»,- ամփոփեց Սուրեն Շահվերդյանը: