Մինչեւ աշխարհը չիմանա եւ ճնշում չգործադրի իշխանությունների վրա, խնդիրը լուծում չի ստանա. ինչ է կատարվում Երուսաղեմում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երուսաղեմի Հայոց պատրիարքությունը պատմական սեփականությունը կորցնելու վտանգի առաջ է կանգնած քաղաքային հարկերի պարտքի պատճառով։ Ենթադրվում է, որ այն կուտակվել է 1994 թվականից։ Եթե դատարանը մերժի պատրիարքության վերաքննիչ բողոքը, քաղաքապետարանը կբռնագանձի և աճուրդի կհանի Հայոց եկեղեցու ունեցվածքը: Հայկական ներկայությունը Երուսաղեմում վտանգված է: NEWS.am-ը այս թեմայով զրուցել է Երուսաղեմի հայոց Պատրիարքարանի հոգեւորական տ. Էմմանուէլ վրդ. Աթաջանեանի հետ:

«Հայկական ներկայությունը առաջին դարից  ի վեր  ներկայություն է ունեցել Սուրբ երկրում՝ Երուսաղեմում: Տարբեր Իշխանութուններ են եղել, Հռոմեական իշխանություն, բյուզանդական իշխանություն: Իսրայելը էստեղ եկել է 1948 թվականից, Իսրայելը 1967-ից վերցրեց Երուսաղեմը եւ այստեղ կա արեւմտյան եւ արեւելյան Երուսաղեմ: Արեւտյան Երուսաղեմը դա հրեական կողմն է,արեւելյան Երուսաղեմը արաբական կողմն է: Արեւմտյան Երուսաղեմում մենք ունենք կալվածքներ, որոնք մեր պատրիարքն է դեռ 100 տարի առաջ գնել, միաբանությունը օժանդակեց պատրիարքին, որովհետեւ նրա նպատակն էր հոգեւոր գրականություն տպագրել:  փառք Աստծո, որ բազում կալվածքներ մինչեւ հիմա այդպես մնացել են: Օրինակ Թորգոմ  պատրիարքը կարողացավ այդ կալվածքները եւ սրբավայրերը  կարգի մեջ պահել եւ ապահովել, որպեսզի վանքը լինի ինքնաբավ, բայց դրանից առաջվա Եղիշե պատրիաքրը շատ հավատարիմ չի եղել վանքին եւ նրա օրոք շատ կալվածքներ են վաճառել եւ  հայերի ձեռքից գնացել: Այդ տենդենցը մինչեւ հիմա ուզում են այսպես ասած փաթաթել մեզ վրա որովհետեւ Նուրհան պատրիարքն էլ տկարություն է ցուցաբերել, մի պարետ նշանակեց Երեցյան ազգանունով, որը տկարություն էր թույլ տվել, պատրիարքին համոզել էր, որ պայմանագրերը, որ ստորագրեն լավ պետք է լինի, բայց իրականության մեջ մենք գիտենք թե դրա հետեւը ինչ է կանգնած եղել:
Սուրբ երկրում կա ստատուս քվո եւ այդ ստատուս քվոն պետք է պահենք, եթե չպահենք մյուս քրիստոնեական եկեղեցիներն էլ պիտի տուժեն: Նախեւառաջ հայերը կտկարանան եւ իրենց ներկայությունը այստեղ կդադարի ինչպես վրացիների ներկայությունն է դադարել 18-րդ դարից ի վեր: Եթե մենք էլ տկարանանք, Սուրբ երկիրը կթողնենք ու կգնանք: Ստեղծված խնդիրը միայն եկեղեցու խնդիրը չէ, այլ ամբողջ ազգի»,-ասաց նա:

 Հարցին, թե արդյոք կուտակված ու չվճարված հարկեր կան, որոնք եկղեցին չի վճարել, թե դա ընդամենը առիթ է ճնշումներ գործադրելու, Աթաջանեանը նշում է, որ դա ընդամենը առիթ է, քանի որ եկեղեցին զուրկ է տուրքերից: 

«Սրանք ասում են, որ պետք է հարկեր վճարեք, բայց եկեղեցին իր առաքելությունը ունի՝ աղքատներին օգնելու, գիր-գրականություն տպելու, անվճար կրթություն տալու եւ այլն: Հիմա էս կառավարությունը այս մեթոդն է օգտագործում, որպեսզի մեզ մի տեղից բռնի, որ հանցավոր հանի եւ այլեւայլ մեղադրանքներ ներկայացնի: Բայդ սրանք փուչ են, սա է ամբողջ խնդիրը իրականության մեջ»,- ասաց նա:

 Հոգեւորականը նշում է, որ հիմա դատական պրոցեսներ են հարուցելով ցանկանում են ապացուցել, իբր եթե հարկերը չեն վճարել, ապա պետք է այս կամ այն կալվածը վերցնել հայերից:

«Մինչեւ աշխարհը չիմանա եւ ճնշում չգործադրի այս իշխանությունների վրա, խնդիրը ոչ մի լուծում էլ չի ստանա: Այս պետությունը մեզ պետք է հարգի եւ ստատուս քվոն չպետք է խախտվի, եկեղեցին տուրքեր չի վճարում»,-ասաց նա:

Հիշեցնենք, որ Երուսաղեմի հայոց պատրիարք Ամեն. Տ. Նուրհան արք. Մանուկյանը նամակ է գրել Իսրայելի վարչապետ Բենյամին Նեթանյահուին արնոնայի (քաղաքապետարանի հարկի) հարցով: Ինչպես հայտնում է Երուսաղեմի Հայոց պատրիարքարանի դիվանապետ Աղան Գոգչյանը, նամակում պատրիարք հայրը հորդորել է վարչապետին միջամտել և դադարեցնել պատրիարքության դեմ ձեռնարկած քաղաքապետարանի գործողությունները, վերսկսել իր նշանակած կառավարական հանձնախմբի հանդիպումները՝ խնդրին լուծում գտնելու համար:

 Հետևեք մեզ՝ այստեղ