Յուրօրինակ շինություններ

ԼԱՅՖ 8 Հուլիս, 2015 18:15

Աշխարհի մի քանի հետաքրքիր շենքերի մասին

Երբեմն դրանք լինում են թեք, կլոր, գլխիվայր կամ չափազանց տարօրինակ, ինչի շնորհիվ էլ հայտնվում են հանրության ուշադրության կենտրոնում:

Եթե պիտանելիության տեսակետից կարծիքները, իրոք, իրարամերժ են, թե նման կառույցները միայն էսթետիկական հաճույք են պատճառում և նախատեսված չեն բնակեցման կամ լիարժեք օգտագործման համար, ոմանց կարծիքով էլ` հակառակը, հենց արտասովոր ճարտարապետական գիծը կամ յուրօրինակ տեսքն է դրդում ընտրել այդ կառույցը որպես հանգստի կամ բնակման վայր կամ պարզապես դարձնում այն ամենահայտնի տեսարժան վայրերից մեկը:

Ամեն դեպքում նման տարօրինակ, բայց աչքի համար այդքան գրավիչ և ոչ տիպային կառույցների կառուցումը շարունակվում է էլ առավել կրեատիվ մտքով:

Երաժշտական տունը

Դաշնամուրի և ջութակի ձևով կառուցված այս տունը գտնվում է Չինաստանի Հուէյ նահանգում:

Շենքի մուտքը սկսվում է ջութակից, որի մեջ ներկառուցված են աստիճաններ և վերելակ:

«Բաբլ» հյուրանոցը

Ֆրանսիական Bubble հյուրանոցը ամենաինքնատիպ և հետաքրքիր հյուրանոցներից մեկն է: Ֆրանսիացի դիզայներ Պիեր-Ստեֆան Դյումայի կողմից կառուցված “Բաբլ” հյուրանոցի սենյակները թափանցիկ են, ինչը հնարավորություն է տալիս համահունչ լինել եղանակային պայմաններին: Ի դեպ, լողասենյակը թափանցիկ չէ, հավանաբար, մի քանի տարի անց` դրան էլ կհասնենք

Նման կրեատիվ հյուրանոցային համարների ստեղծման դեպքում մեծ դեր են ունեցել բոլորիս քաջ ծանոթ Սուրբ ծննդյան ապակեպատ կլոր հուշանվերները:

Պրահայի Պարող տունը

Պրահայի այս պարող տունը Չեխիայի մայրաքաղաքի ամենահետաքրքիր տեսարժան վայրերից մեկն է: Ինչո՞ւ պարող տուն. անվանումը պատահական չէ: Շինությունը բաղկացած է երկու մասերից, երկու պարողներից` ի պատիվ Ջինջեր և Ֆրեդ հայտնի հոլիվուդյան պարային զույգի:

Կլորաձև շենքի տանիքին գտնվում է ռեստորան, իսկ այս շինության մեջ իրենց աշխատաժամերն են սպառում մի շարք միջազգային կազմակերպություններ:

Թեք տնակը Լեհաստանում

Եթե հայտնվեք Լեհաստանի Սոպոտ քաղաքում, կլսեք այս թեք տան մասին բազմաթիվ ասեկոսեներ, թե այստեղ ապրում են թզուկներ, այն օժտված է կախարդական հատկություններով և այլն: Իրականում այս հետաքրքիր թեք կառույցում գտնվում է առևտրային կենտրոն:

Եվս մեկ «ծուռ» տուն Ավստրիայում

«Ծուռ» անվանումն այդքան էլ չի վերագրվում շինության թեքությանը, ավելի շատ բնակիչներն են այդպես այն կոչում` տարօրինակության և անհավասարության պատճառով:

Ավստրիական Վիեննայում գտնվող այս շինության ճարտարապետ Ֆրիդենսրայխ Հունդերտվասերի կարծիքով` մարդիկ չպետք է ապրեն միևնույն չափերի բնակարաններում, այլ դրանք պետք է տարբերվեն իրենց գույներով, արտաքին ձևերով և նույնիսկ պատուհանների տեղադրման դիրքով:

Շարունակում ենք թեքության թեման` «Թեք տուն» Մեծ Բրիտանիայի Դուդլի քաղաքում

Մեծ Բրիտանիայի ամենահայտնի տեսարժան վայրերից մեկն ամենևին էլ նախատեսված չի եղել լինել թեք և դառնալ այսքան հայտնի: Թեքությունն առաջացել է ժամանակի հետ, երբ շինության մի հատվածի տակ հողը նստել է:

Պիզայի հանրահայտ աշտարակը

Խոսելով թեք շինությունների մասին, իհարկե, չէր կարող չհիշատակվել Պիզայի աշտարակը:

«Ճաք տված» տունը ամերիկյան Բրենսոնում

Ամերիկյան Բրենսոն քաղաքում գտնվող «Ռիփլի» տունը ծառայում է որպես թանգարան: Կառույցի ճաքերը հատուկ են մտածվել` շինությանը 8-բալլանոց երկրաշարժի ուժգնություն հաղորդելու համար: Այս թանգարանում պահվում են աշխարհի տարբեր անկյուններից հավաքված տարօրինակ իրեր:

Ի դեպ, կառույցի մոտ կանգնեցված է դինոզավրի արձան, որը խժռում է հակառակ ուղղությամբ շարժվող ժամերը, որոնք տարօրինակ կերպով միշտ ճիշտ ժամն են ցույց տալիս:

«Քաղաքային կակտուսը» Ռոտերդամում

Էկոլոգիապես մաքուր տասնյակ շինությունների մեջ արդեն ընդգրկված այս կառույցը վերջնական աշխատանքներից հետո կզարդարի Նիդեռլանդների Ռոտերդամ քաղաքը: Արտաքնապես կակտուս հիշեցնող այս շինությունը համարվում է նաև էկոլոգիապես մաքուր կառույցներից մեկը, որի յուրաքանչյուր պաշտգամբ վերածել են փոքրիկ այգու:

Նման մոտեցմամբ շեշտը դրվել է ոչ միայն բնակելի տարածքների օգտակարության, այլև դրանց կանաչապատման վրա: Շինությունը դեռ վերջնականապես ավարտված չէ:

«Հաբիտատ», Մոնրեալ

«Հաբիտատ 67» համալիրը բնակելի տարածք է կանադական Մոնրեալում: Այս բազմահարկ և բազմաշերտ կառույցը դարձել է Կանադայի խորհրդանիշներից մեկը:

Պեկինի Օպերայի տունը

Այս շինությունը համարվում է աշխարհի ամենագեղեցիկ և յորօրինակ կառույցներից մեկը: Ֆրանսիացի ճարտարապետի աշխատանքը գեղեցկացնում է Պեկինը: Օպերայի կառույցը գտնվում է լճի մեջտեղում: Կառույցը հատկապես գեղեցիկ է գիշերային լույսերի ներքո: