Հարավային հարմարավետություն. ի՞նչ է այն և ինչո՞ւ է այդպես կոչվում. «Փաստ»

«Փաստ» օրաթերթը գրում է.

Ամերիկյան պրեմիում դասի Southern Comfort (հարավային կոմֆորտ՝ հարմարավետություն) լիկյորը բավական հայտնի է այդ տեսակի խմիչքի սիրահարներին: Այն պատրաստված է վիսկիից և ավելացված համեմունքների շնորհիվ ունի բարդ մրգային համ ու բուրմունք:

Ըմպելիքն ունի խիտ սաթի գույն և զարմանալիորեն նուրբ համ՝ բավականին չափավոր քաղցրությամբ։ Չնայած ալկոհոլի բավականին բարձր պարունակությանը (39 %), ըմպելիքը լավ է խմվում ոչ միայն կոկտեյլների կազմում, այլ նաև մաքուր տեսքով: Իր համային հատկությունների շնորհիվ այդ լիկյորը հավասարապես տարածված է ինչպես տղամարդկանց, այնպես էլ կանանց շրջանում։

Ամերիկյան հարավը Միացյալ Նահանգների առանձնահատուկ տարածք է։ Տեղացիները միշտ շատ են տարբերվել ամերիկյան մնացած բնակչությունից՝ կյանքի, ավանդույթների և այլ հարցերի վերաբերյալ իրենց հայացքներով: Եվ միանգամայն բնական է, որ նրանք նաև սեփական ըմպելիք են ստեղծել։ Այն հայտնագործվել է 1874 թվականին, երբ Մարտին Հերոնը որոշել է «կատարելագործել» վիսկին:

Փաստն այն է, որ այն ժամանակ վիսկին բավականին սուր համ ուներ և շատ հաճախ իրենից ներկայացնում էր անորակ տնական օղի: Այդ պատճառով էլ Նոր Օռլեանի բարերից մեկում աշխատող մի երիտասարդ որոշեց ավելի բարդ ըմպելիք պատրաստել, որը նաև կպահպաներ վիսկիի բույրը: Շատ փորձերի ու սխալների միջով անցնելով՝ Մարտինին հաջողվեց ստեղծել նուրբ ու բարդ համով ըմպելիք, որը շատ արագ դարձավ քաղաքի խորհրդանիշներից մեկը։ Հենց այդ բարմենն է իր մտահղացումը անվանել Հարավային կոմֆորտ:

Մարտին Հերոնը հաճախ ասում էր, որ բաղադրատոմսը իրեն առաջարկել է հենց հարավի բնությունը. ըստ այդ տրամաբանության, նա պետք է վերցներ մրգեր և խոտաբույսեր ու թրմեր դրանք վիսկիով: Պետք է ասել, որ Հերոնը շատ համեստ է։ Փաստն այն է, որ Southern Comfort–ի արտադրական գործընթացը ներառում է բոլոր բաղադրիչների մանրակրկիտ ընտրություն, բազմաթիվ թորումներ և կրկնաթորումներ: Բաղադրիչների թիվը գերազանցում է հարյուրը։ Այնպես որ, այստեղ միայն բնությունը բավարար չէ, անհրաժեշտ է լինել այդ արհեստի լավ գիտակ՝ նման գլուխգործոց ստեղծելու համար։

Խմիչքը շատ արագ դարձավ այնքան հայտնի, որ Մարտինը ոչ միայն առաջարկում էր այն բարում, այլ նաև սկսել էր վաճառել շշերով: Լիկյորը հաճախ կոչվում էր «Հարավի լեգենդ»: Ըմպելիքն իր առաջին միջազգային հաջողությանը հասել է 1900 թվականին Փարիզի համաշխարհային ցուցահանդեսում, իսկ 1904 թվականին Սենթ Լուիսի նմանատիպ ցուցահանդեսում արժանացել է բարձրագույն մրցանակի։ Այդ ժամանակից ի վեր այդ լիկյորի համաշխարհային ժողովրդականությունը միայն աճել է: Այդ լիկյորի վրա հիմնված որոշ կոկտեյլներ արդեն ավելի քան 60 տարեկան են: Առաջին գիրքը կոկտեյլների բաղադրատոմսերով՝ հիմնված Southern Comfort-ի վրա, հայտնվել է դեռևս 1954 թվականին, և այդ ժամանակվանից նրանք հայտնի են դարձել աշխարհի բազմաթիվ բարերում:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում