Ի՞նչ իրավիճակ է Լոռիում երեկվա երկրաշարժից հետո

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երեկ երկրաշարժ էր գրանցվել Լոռու մարզում, Սպիտակ քաղաքից 8 կմ դեպի հյուսիս՝ 4 բալ ուժգնությամբ։

Երկրաշարժից բացի մարզում նաև առատ ձյուն էր տեղացել, և ինչպես MediaHub-ին փոխանցել էին՝ Լոռիում վիճակն ուղղակի աննկարագրելի էր։ 

«Այս ամենից բացի՝ ուշ երեկոյան էլեկտրամատակարարման մասսայական վթարներ են արձանագրվել Ալավերդիում, Օձունում, Այգեհատում, Արդվիում, Հագվիում։ Երկրաշարժից հետո տարածաշրջանն ամբողջությամբ հոսանքազրկված է։ Ենթադրվում է, որ Վանաձորի և Ալավերդիի հարակից հատվածում բարձրավոլտ աշտարակ է ընկել։ Պատկերն անմխիթար է նաև ներքին ցանցերում։ Թաց, ծանր ձյան հետևանքով բազմաթիվ ընկած էլեկտրասյուներ կան»,- երեկ ահազանգում էր մարզի բնակիչներից մեկը: 

Ձնածածկույթը տեղ-տեղ հասել էր մինչև 30 սմ, ինչի հետևանքով ստեղծվել է բավականին բարդ արտակարգ իրավիճակ։ Առավոտյան Ալավերդիում մարդիկ խուճապի էին մատնվել, տեղ-տեղ հոսանքազրկումը պահպանվել էր, ինչի հետևանքով նաև դպրոցների ջեռուցումն անջատված էր եղել, երեխաները դասի չէին գնացել, իսկ Ալավերդիի բնակիչների մեծ մասը՝ աշխատանքի։

Ի՞նչ իրավիճակ է այսօր Ալավերդիում, արդյո՞ք հոսանքազրկումից հանել են Ալաավերդին և լուծել հարցը․ MediaHub-ը կապ հաստատեց Լոռու բնակչի հետ, ով նշեց, որ Ալավերդիում ամենը նորմալ է։

«Այսօր ամենը նորմալ է, հոսանքազրկումից հանեցին, արդեն լույս ունենք, իսկապես մարդիկ խուճապի մեջ էին, մեզ թվաց՝ լուրջ խնդիր է եղել, և մի քանի օր լույս չենք ունենալու, հետևապես նաև ջեռուցում, մասնավորապես, երբ դրսում ձյուն է»,- ասաց մեր զրուցակիցը։

Հարցին, թե ի վերջո ո՞վ լուծեց խնդիրը, և ի՞նչ էր եղել, Լոռու բնակիչը պատասխանեց․ «Տեղի իշխանություններն արագ-արագ փորձում էին հարցը կարգավորել, որ հանկարծ չբողոքենք, այդպես էլ չիմացանք՝ ի՞նչ էր եղել, քանի՞ սյուն էր ընկել»։

«Ամենն արագ անում էին, սակայն, էս միայն ջրհեղեղից ու մարդկանց բողոքներից հետո։ Մի ձյուն ա գալիս, հոսանքազրկվում են քաղաքները, արդեն չենք հասկանում՝ ի՞նչ է կատարվում մեր մարզում, ինչո՞ւ հենց մեր մարզը։ Հիմա էլ, որ չբողոքենք, տեղի իշխանություններն երեկ ակտիվ խնդիրներն էին լուծում, որ մեկս ծպտուն չհանի։ Բայց դե այսօր ամենը նորմալ է, մեր օրակարգով ապրում ենք»,- նշեց նա։

 Հետևեք մեզ՝ այստեղ