Բուն Բարեկենդանի տոնը մեծ շուքով կնշվի Ազատության հրապարակում

Արարատյան Հայրապետական թեմն արդեն 3-րդ տարին է` մեծ շուքով պետք է նշի Մեծ Պահքին նախորդող Բուն Բարեկենդանի տոնը: Հայկական դիմակահանդեսի նախապատրաստման գործում մեծ ներդրում ունեն թեմի երիտասարդները, ովքեր ճաշացանկից մինչև ավանդական խաղերն ուսումնասիրել են` տոնը հավուր պատշաճի անցկացնելու համար:

Արարատյան Հայրապետական Թեմիերիտասարդաց կառույցներիհամակարգող, Առաջնորդանիստ ՍուրբՍարգիս եկեղեցու հոգևոր սպասավոր ՏերՊետրոս ավագ քահանա Մալյանը«Արմենպրես»-ի հետ զրույցում ներկայացրեց փետրվարի 7-ին կայանալիք Բուն Բարեկենդանի տոնակատարության մանրամասները: «Կիրակի օրը` ժամը 11:00-ին, մատուցվելու է Սուրբ պատարագ, որից հետո` 13:30-ին, թեմի երիտասարդները,  համայնքների հավատացյալները , ազգագրական երգի ու պարի համույթները, Երևանի տարբեր համայնքները ներկայացնող մշակութային խմբերը հավաքվելու են Առաջնորդանիստ Սուրբ Սարգիս եկեղեցու մոտ, իսկ 14:00-ից մեկնարկելու է տոնական շքերթը: Սուրբ Սարգիս եկեղեցուց Մաշտոցի պողոտայով պետք է շարժվենք դեպի Ազատության հրապարակ, որտեղ էլ նախատեսված են տարբեր միջոցառումներ»,-հայտնեց Տեր Պետրոսը:

Նրա խոսքով` երթին կարող են մասնակցել բոլոր ցանկացողները, ովքեր արդեն Ազատության հրապարակում ականատես կլինեն ազգային երգի ու պարի, թատերական խմբերի ելույթներին, կկարողանան դիտել և մասնակցել ազգային խաղերին: «Բացի այդ՝ կբացվի Սուրբ Սարգսի տոնին նվիրված տարբեր մշակութային ուսումնական հաստատությունների աշակերտների թեմատիկ նկարների ցուցահանդես, իսկ Բուն Բարեկենդանին նվիրված ուտեստների ցուցադրություն-վաճառքի հասույթը կուղղվի բարեգործության»,-ավելացրեց մեր զրուցակիցը:

Տեր Պետրոսի տեղեկացմամբ` Բուն Բարեկենդանին թույլատրվում է ուտել ամեն ինչ, իսկ արդեն հաջորդ օրվանից, երբ մեկնարկում է 48-օրյա Մեծ Պահքը, պետք է անցնել ժուժկալ սննդակարգի ու վարքի:

Բարեկենդանին նախապատվությունը տրվում է մսեղենի, կաթնեղենի առատությանը: Տավարի, ոչխարի և թռչնեղենի մսից պատրաստում են տարբեր ճաշատեսակներ, ուտում են խաշած ձու, զերծ չեն մնում նաև քաղցրեղենից: Բուն Բարեկենդանի տոնական սեղանին նախընտրելի է տեսնել փահլավա, գաթա, հալվա: Եվ ինչպես ժողովրդական խոսքն է ասում` «Բուն Բարեկենդանին ձվով փակում են բերանները, որ Սուրբ Հարության տոնին  ձվով էլ բացեն»:

Շքերթին երիտասարդները կոչ են անում իրենց հետ վերցնել նաև դիմակներ` դիմակահանդեսը լիակատար դարձնելու նպատակով:

Բարեկենդան բառացի նշանակում է կենդանություն, բարի կյանք:

Մեծ պահքի բարեկենդանը կոչվում է Բուն Բարեկենդան, քանի որ նախորդում է ամենաերկար պահքին: Բարեկենդանը մարդու երջանկության հիշատակն է, որը դրախտում վայելում էին Ադամն ու Եվան: Այն նաև դրախտային կյանքի օրինակն է, որտեղ մարդուն արտոնված էր ճաշակել բոլոր պտուղները, բացառությամբ բարու և չարի` գիտության ծառի պտղից, որը պահքի  խորհրդանիշն է: Բարեկենդանն առաքինությունների արտահայտություն է: Այդ օրը մարդիկ սգից անցնում են ուրախության, չարչարանքից` խաղաղության: Այս ընկալմամբ է, որ յուրաքանչյուր քրիստոնյա հոգու խոնարհումով, ապաշխարությամբ, ահքով և ողորմության հույսով  սկսում է Մեծ պահքի ճանապարհը: Այն տևում է 48 օր՝ Բուն Բարեկենդանից մինչև Ս. Հարության՝ Զատկի տոնը (աղբյուրը` qahana.am):