Բենիկը գումար չի մուրում, գուլպաներ է վաճառում․ Արցախից տեղահանված ընտանիքը հայտնվել է անելանելի վիճակում
ՀԱՍԱՐԱԿՈՒԹՅՈՒՆՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Արցախից տեղահանված ու Գյումրիում ապաստանած Չալյանների ընտանիքն անցած տարվա մայիսից զրկվել է պետության կողմից տրամադրվող 40+10 հազար դրամական աջակցությունից։ Օրերս տարածվեց մի տեսանյութ, որտեղ 86-ամյա Բենիկ Չալյանը Գյումրու փողոցներում ստիպված վաճառում էր կնոջ գործած գուլպաները։
Կինը՝ Լյուբան MediaHub-ին ասաց, որ ընտանիքը տեղահանվել է 3 անգամ։
«1988-ին, երբ Բաքվում սկսվեց հայերի նկատմամբ ջարդը, ստիպված տեղափոխվեցինք Արցախ։ Պատերազմում տարած հաղթանակից հետո ապաստանել ենք ազատագրված Շուշիում, այնտեղ ապրել շուրջ 3 տասնամյակ։ 44-օրյա պատերազմից հետո, երբ Շուշին գրավեցին ադրբեջանցիները՝ գնացինք Ստեփանակերտ։ 2023-ի սեպտեմբերի իրադարձություններից հետո եկանք Գյումրի։ Հատկացվող աջակցությունից զրկեցին մեզ, ասելով, որ սերտիֆիկատի շահառու եք։ Շատ կցանկանայի, որ բնակարան կարողանանք ձեռք բերել, բայց 10 միլիոն դրամի սահմանում առայժմ բնակարան չենք գտել։ Իսկ այստեղ, որտեղ հիմա բնակվում ենք՝ կոմունալ ծախսերի հետ վճարում ենք մոտ 150 հազար դրամ»,-պատմում է Լյուբա Չալյանը։
Տարեց ամուսինները բնակվում են դստեր և նրա որդու հետ։ Դուստրը դեռ աշխատանք չի գտել, թոռն էլ մեկ շաբաթ է, ինչ աշխատում է։ Իսկ Բենիկը, որի մասնակցությամբ տեսանյութը տարածվել է համացանցում, շարունակում է ձեռագործ գուլպա վաճառել՝ օրվա հացի խնդիրը լուծելու համար.
«Տան վարձը, կոմունալ, սննդի ծախսերը հոգալ է հարկավոր։ Հայտնվել ենք անելանելի վիճակում»։
Բենիկի ընտանիքը չի իմացել, որ նրա հարցազրույցը մեծ արձագանք կունենա։ Կինն ասաց, որ երեկոյան սկսվել է զանգերը, շատերը պատրաստակամություն են հայտնել օգնելու.
«Բենիկը փողոցում գումար չէր մուրում, նա վաճառում է գուլպաները»,-հավելեց 77-ամյա կինը։
Հունան Թադևոսյան
Հետևեք մեզ՝ այստեղ
