Եվս մեկ հագուստ տղամարդկանցից՝ կանանց համար. «Փաստ»

«Փաստ» օրաթերթը գրում է.

Ամենայն հավանականությամբ, ցանկացած ժամանակակից կնոջ զգեստապահարանում հեշտությամբ կարելի է գտնել ժակետ: Դա, ինչպես և հագուստի շատ այլ տեսակներ, ժամանակի ընթացքում տղամարդկանցից, ի վերջո, անցել են կանացի զգեստապահարան: Շատ հետազոտողներ համաձայն են, որ «ժակետը», որպես տղամարդու հագուստի տեսակ, հայտնի է եղել դեռևս միջնադարում: Ժամանակի ընթացքում այն «մուտացիայի» է ենթարկվել և դարձել նաև իգական սեռի հագուստ:

Ելնելով «ժակետ» բառի ֆրանսիական ծագումից՝ հեշտ է եզրակացնել, որ առաջին նման զգեստը պատրաստել է ֆրանսիացի: Դա եղել է դերձակ Ժակը, որը, հետագայում հիմնվելով «pi de Jacques» (տղամարդու կոստյում) մոդելի վրա, ստեղծել է այդ կարճեցված վերնազգեստի կանանց համար նախատեսված տարբերակը։

Նշենք, որ մինչև 19-րդ դարը դերձակները հագուստ էին կարում հիմնականում բնակչության արական կեսի համար։ Մոդելիստների ծառայություններից օգտվում էին միայն սոցիալական բարձր կարգավիճակ ունեցող կամ անհրաժեշտ միջոցներ ունեցող կանայք։ Կանայք, ովքեր նման հնարավորություններ չեն ունեցել, սեփական ձեռքերով են կարել իրենց հագուստը։

Կանանց գործնական կոստյումների և, հետևաբար, նաև ժակետների պատմության մեջ կարևոր հետք է թողել անգլիական պալատական դերձակ Ռեդֆերնը, որը 19-րդ դարում աշխատել է Անգլիայի Վիկտորյա թագուհու արքունիքում: Հետաքրքիր փաստ է այն, որ մի օր դերձակին խնդրել են զբոսանքի կոստյում պատրաստել Ուելսի արքայադուստր Ալեքսանդրայի համար: Այն պատրաստելիս Ռեդֆերնը հիմք է ընդունել տղամարդու բաճկոնը և կնոջ զգեստը. վերցնելով կոստյումի վերնամասը և շրջազգեստի ստորին մասը՝ կիսաշրջազգեստը, ձևավորել է կոստյում։ Վերին մասը, որոշ ժամանակ անց դարձել է ժակետ, որը, որպես կանոն, կրում էին ժիլետներով ու բլուզներով։ Մարդկանց ակտիվ ապրելակերպի անցնելու արդյունքում (մրցարշավներ, զբոսանքներ, ձիավարության և տարբեր ճամփորդություններ) ժակետից և կիսաշրջազգեստից բաղկացած կոստյումը արագ տարածում է գտել, հատկապես, որ դրա հիմնական որակը հարմարավետությունն էր: Ժակետի մասսայականացման մեջ իր ներդրումն է ունեցել նաև հայտնի «հեղափոխական նորաձևության դիզայներ» Կոկո Շանելը, որը հաճախ էր ուսումնասիրում տղամարդկանց զգեստապահարանները՝ նոր գաղափարներ փնտրելու համար։ Այն բանից հետո, երբ 1936 թվականին Շանելը Վեսթմինսթերի դուքսի առանձնասենյակում տեսավ տղամարդու թվիդային բաճկոն, կանանց համար ժակետի նորաձևության մեջ մտնելը կանխորոշված էր: Եզրակարերով ժակետը, որը չուներ օձիք, կոչվեց «ժակետ ա-լյա Շանել»: Այն շատ տարածված է այսօրվա մոդայի սիրահարների շրջանում:

Իսկ ահա բոլերո ոճի ժակետը՝ կարճ փեշերով, հայտնվել է կանանց զգեստապահարաններում իսպանացի ցլամարտիկների շնորհիվ։ Կանայք սովորաբար այն հագնում են շրջազգեստների վրայից։ Կանանց զգեստի այդ տարրը նրբագեղորեն ծածկում է ուսերը, և գեղեցիկ շրջազգեստը դարձնում է երևացող:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում